歷代志上 第 13 章 - 台語漢字羅馬本

1
大衛及諸個千總、百總,及諸個頭人參詳。
2
大衛對以色列全會講:「恁若掠做好,閣是出佇耶和華──咱的上帝的意思,今咱就差人遍行以色列全地,見咱許個猶剩的兄弟及踮佇有郊野的城的祭司利未人,互攏聚集到咱遮。
3
咱就通帶咱的上帝的約櫃到咱遮;因為掃羅的時陣,咱無用彼個來問上帝。」
4
全會攏講通按呢行;眾百姓攏看此個代誌做好。
5
對按呢,大衛召以色列人對埃及西曷的溪直到哈馬出入的所在,欲帶上帝的約櫃對基列耶琳來。
6
大衛及以色列眾人就到巴拉,就是屬猶大的基列耶琳,愛欲對遐帶彼個踮佇兵中間耶和華上帝的約櫃,就是用伊名來稱呼者。
7
用新的車,載上帝的約櫃對亞比拿達的厝出來。烏撒及亞希約趕車。
8
大衛及以色列眾人佇上帝的面前盡力唱歌,用琴、瑟、鑼、鼓、號頭,作樂跳舞。
9
到基頓的五穀場;因為牛著觸,烏撒伸手按彼個櫃。
10
耶和華受氣烏撒,因為伊伸手按約櫃就拍伊,伊就死佇遐佇上帝的面前。
11
大衛因為耶和華拍烏撒,就無歡喜,號彼個所在做毗列斯烏撒,直到今仔日。
12
彼日,大衛驚上帝,就講:「我豈可通帶上帝的約櫃到我的所在?」
13
對按呢大衛無帶約櫃到大衛的城家己的所在,就轉到迦特人俄別以東的家。
14
上帝的約櫃佇俄別以東的家佇伊的厝三月日久,耶和華賜福佇俄別以東的家及伊一切所有的。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!