列王紀上 第 10 章 - 台語漢字羅馬本

1

示巴的女王聽見所羅門的名聲，為著耶和華的名所得著的，就來欲用得解明的事試伊。

2

伊到耶路撒冷隨伊的人真多，有駱駝載香料、及黃金真多，也有寶石。伊見所羅門的時，就將心內一切所存的及伊講。

3

所羅門照伊所問的攏應伊，無一項王曉得通給伊講。

4

示巴女王看見所羅門一切的智慧，及伊所起的厝，

5

桌頂的食物，人臣排列坐，奴僕跟隨服事，以及的衣服及伊的酒政，閣看見伊上耶和華殿的崎仔，就魂不附體；

6

伊就對王講：「我佇本國聽見你的代誌及你的智慧攏是真實！

7

總是我呣信許個話，到我來親目看見才知人所給我講的猶無一半。你的智慧及你的亨通贏過我所聽見的名聲。

8

福氣啊！你的人，福氣啊！你的奴僕常常徛佇你的面前聽你的智慧。

9

耶和華──你的上帝是應該謳咾的！伊歡喜你，互你坐以色列的國位；因為耶和華永遠疼以色列，所以設立你做王，互你秉公行義。」

10

伊用一百二十他連得的金，及多多的香料，及寶石，送王。以後所來的香料，呣曾閣親像示巴女王送所羅門王的許多。（

11

希蘭的船隻對俄斐帶金來的，閣對俄斐帶多多檀香柴，及寶石來。

12

王用檀香柴為耶和華的殿及王宮做欄杆，閣為唱歌的人做琴瑟。以後呣曾閣有彼號檀香柴來，也無人看見，直到今仔日。）

13

所羅門王照王的禮用物送示巴的女王，以外閣用女王見所愛，見所求的，送伊。對按呢伊及伊的人臣倒轉去伊本國。

14

所羅門逐年所得著的金共六百六十六他連得。

15

以外有遊歷的及往來的生理人以及雜族諸個王，及國內諸個首領所納的。

16

所羅門王用過拍的金做大牌二百面，每面大牌的金六百舍客勒；

17

閣用過拍的金做屏牌三百面，每面用金三彌那，王下伊佇黎巴嫩樹林的厝。

18

王閣用象牙做一個大寶座，用好金安伊。

19

寶座有六層的崎仔，座位撐的頂面是圓的，雙旁有靠手，靠手邊有二隻獅徛。

20

閣有十二隻獅徛佇六層崎仔的此旁及彼旁；別國攏無製造親像按呢。

21

所羅門王一切飲的器具攏是金的。黎巴嫩樹林的厝一切的器具也是好金的，攏無銀的。所羅門的年間，人看銀做無物。

22

因為王有他施的船隻一陣及希蘭的船隻一陣相及過海，諸個他施歸陣的船載金銀、象牙、猴、孔雀，三年倒來一擺。

23

所羅門王的好額及智慧贏過天下列王。

24

天下的人攏來愛見所羅門的面，聽伊的智慧就是上帝賞賜佇伊的心的。

25

逐個帶進貢的物，就是銀器、金器、衣服、軍器、香料、馬，及騾，逐年有定著的例。

26

所羅門就聚集戰車馬兵，有戰車一千四百張，馬兵一萬二千名，安置佇許個囤車的城也及王佇耶路撒冷。

27

王佇耶路撒冷互銀親像石頭，互柏香柴親像平洋的桑材樹，是因為真多。

28

所羅門的馬是對埃及帶來的，是王的生理人一陣一陣照價錢得著的。

29

對埃及上來的車，每張價銀六百舍客勒，馬每匹一百五十。赫人諸個王及亞蘭諸個王，攏對經手照按呢帶出來。