列王記上 第 15 章 - 台語漢字羅馬本

1
尼八的子耶羅波安王十八年,亞比央坐位做猶大王,
2
佇耶路撒冷做王三年。伊的老母名叫瑪迦,是押沙龍的查某子。
3
亞比央行伊的老父從前所行一切的罪惡,伊的心無親像伊的祖大衛的心,專一向耶和華──伊的上帝。
4
總是耶和華──伊的上帝因為大衛的緣故,互伊佇耶路撒冷有一葩燈,互伊的子續接伊的位,閣互耶路撒冷堅固。
5
因為大衛除赫人烏利亞彼件事以外,攏是行耶和華所看做好的,一生無違背所命令伊的。
6
羅波安及耶羅波安一生常常交戰。
7
亞比央其餘的事,見伊所行的,豈無記佇猶大列王的記錄嗎?亞比央也有及耶羅波安交戰。
8
亞比央及伊的列祖同睏,人埋葬伊佇大衛的城。伊的子亞撒續接伊做王。
9
以色列王耶羅波安二十年,亞撒起頭做王佇猶大,
10
佇耶路撒冷做王四十一年。伊的媽名叫瑪迦,是押沙龍的查某子。
11
亞撒行耶和華所看做好的,親像伊的祖大衛一樣,
12
對國內除去孌童,閣除去伊的列祖所做一切的偶像;
13
閣貶伊的媽瑪迦太后的位,因為伊為亞舍拉曾妝可惡的像。亞撒剉伊的像,燒伊佇汲淪溪邊,
14
獨獨山頭壇無廢去。總是亞撒一生專一的心向耶和華。
15
伊將伊的老父所分別做聖及伊本身所分別做聖的金銀及器具攏帶到耶和華的殿。
16
亞撒及以色列王巴沙一生的日常常交戰。
17
以色列王巴沙上來攻擊猶大,起拉瑪,欲阻擋人出入佇猶大王亞撒遐。
18
亞撒就將耶和華殿的府庫及王宮的府庫所剩的金銀攏交伊的奴僕的手,亞撒王差到徛起佇大馬色的亞蘭王──希旬的孫、他伯利們的子便哈達遐,
19
講:「我及你有約親像我的老父及你的老父一樣。今我用金銀做禮物送你,請你去廢無你及以色列王巴沙所立的約,互伊離開我。」
20
便哈達聽趁亞撒王的話,差伊許個軍長去攻擊以色列的城;伊就攻破以雲、但、亞伯伯瑪迦、基尼烈全地、拿弗他利全地。
21
巴沙聽見,就停工無閣起拉瑪,就住佇得撒。
22
對按呢亞撒王出命令互猶大眾人,無一人會推得,就搬徙巴沙所用來起拉瑪的石頭及柴,亞撒王用伊來起便雅憫的迦巴及米斯巴。
23
亞撒其餘的事,及伊的能力,以及伊一切的所做及伊所起的城,豈無記佇猶大列王的記錄嗎?亞撒年老的時,伊的腳有破病。
24
亞撒及伊的列祖同睏,及伊的祖葬佇伊的祖大衛的城。伊的子約沙法續接伊做王。
25
猶大王亞撒二年,耶羅波安的子拿答起頭做王佇以色列,伊做王佇以色列二年,
26
拿答行耶和華所看做歹的事,行伊的老父的路,及伊的老父互以色列犯罪的罪。
27
以薩迦族亞希雅的子巴沙背叛伊,巴沙拍死伊佇非利士人的基比頓。彼時拿答及以色列眾人圍困基比頓。
28
猶大王亞撒三年巴沙拍死伊,來篡伊的位。
29
伊一下做王就拍死耶羅波安全家,見有喘氣的無給耶羅波安留一個,攏總滅伊,是照耶和華託伊的奴僕示羅人亞希雅所講的話。
30
這是因為耶羅波安所犯的罪及伊所互以色列人犯罪的罪,因為伊所激動的,就是激動耶和華──以色列的上帝的受氣。
31
拿答其餘的事,見伊所行的,豈無攏記佇以色列列王的記錄嗎?
32
亞撒及以色列王巴沙一生常常交戰。
33
猶大王亞撒三年,亞希雅的子巴沙佇得撒坐位做以色列眾人的王共二十四年。
34
伊行耶和華所看做歹的事,行耶羅波安的路,及伊互以色列人犯罪的罪。

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!