撒母耳記上 第 18 章 - 台語漢字羅馬本

1

大衛及掃羅講明白，約拿單的生命及大衛的生命生相連。約拿單疼伊，親像家己的生命。

2

彼日掃羅留伊，無互伊倒去老父的家。

3

約拿單及大衛二人結約，因為伊疼伊親像家己的生命。

4

約拿單褪伊身軀的外衫，互大衛，閣將伊的軍服，連伊的刀，伊的弓，伊的腰帶，也互伊。

5

見若掃羅差伊去叨落，大衛所去無呣精通。掃羅就設立伊做戰士的頭人，眾百姓及掃羅的人臣攏看做好。

6

大衛拍死彼個非利士人倒轉，倒來的時，許個婦女對以色列逐個城出來，唱歌跳舞，用鈴瓏鼓，用歡喜，用作樂的器具，來迎接掃羅王。

7

許個婦女跳舞有的唱有的和，講：「掃羅死千千，大衛死萬萬。」

8

掃羅不止受氣，無歡喜此個話，就講：「將萬萬互大衛，千千互我，只有剩國位未互伊若定。」

9

對彼日起，掃羅看見大衛就眥伊。

10

隔日，對上帝遐來的歹神大大臨到掃羅，伊就佇厝內講先知話。大衛照常用手彈琴，掃羅手裡有槍。

11

掃羅用槍擲去，因為講，我欲刺大衛，釘伊佇壁裡。大衛佇伊的面前閃避二擺。

12

掃羅驚大衛；因為耶和華及伊佇，離開掃羅。

13

掃羅才互大衛離開伊，設立伊做千總，伊佇百姓的面前出入。

14

大衛見所做的代誌無呣精通，耶和華及伊佇。

15

掃羅看見大衛所做的代誌真精通，不止驚伊。

16

獨獨以色列及猶大的眾人攏疼大衛，因為伊佇面前出入。

17

掃羅給大衛講：「看啊，我欲用大查某子米拉互你做某，獨獨愛你做我的勇士，替耶和華交戰。」掃羅心內講：「我呣通親手害伊，著借非利士人的手害伊。」

18

大衛給掃羅講：「我是是誰，我有甚麼身份，我老父的家佇以色列中是甚麼號的家，我通做王的子婿嗎？」

19

掃羅的查某子米拉定著互大衛的期到啦，竟然互米何拉人亞得列做某。

20

掃羅的查某子米甲疼大衛。有人給掃羅講，掃羅歡喜此個事。

21

掃羅心內講：「我將此個查某子互大衛，做羅網來網伊，通借非利士人的手害伊。」掃羅就給大衛講：「今此個第二擺你通做我的子婿。」

22

掃羅吩咐人臣講：「恁暗靜給大衛講：『王歡喜你，人臣也疼你，所以你通做王的子婿。』」

23

掃羅的人臣就將諸個話講互大衛聽。大衛講：「恁拍算做王的子婿是小可事嗎？我是喪鄉卑微的人。」

24

掃羅的人臣回覆講，大衛所講的按呢按呢。

25

掃羅講：「恁著對大衛按呢講：『王呣愛甚麼聘禮，只有欲一百個非利士人陽物的皮，通報仇佇王的對敵。』」掃羅的意思欲互大衛死佇非利士人的手。

26

伊的人臣將諸個話給大衛講，大衛歡喜欲做王的子婿。日期猶未到，

27

大衛起來及隨伊的人起身去，死二百個非利士人，大衛帶許個陽物的皮，就照數額一盡獻互王，互伊通做王的子婿。對按呢掃羅將查某子米甲互伊做某。

28

掃羅看見閣知耶和華及大衛佇，閣掃羅的查某子米甲也疼伊，

29

掃羅益發驚大衛，掃羅常常做大衛的對敵。

30

非利士許個首領出來交戰，逐擺出來，大衛所行比掃羅許個人臣卡精通，對按呢伊的名互人閣尊重。