歷代志下 第 10 章 - 台語漢字羅馬本

1

羅波安去示劍，因為以色列眾人到示劍，欲設立伊做王。

2

前尼八的子耶羅波安閃避所羅門王的面，走去埃及，踮佇遐；耶羅波安聽見此個事，就對埃及倒來。

3

差人去叫伊來，耶羅波安就及以色列眾人來見羅波安；

4

給伊講：「你的老父互阮背艱苦的軛；你的老父所下佇阮的苦工及重的軛，求你減輕，阮就服事你。」

5

羅波安給講：「三日後閣來見我！」百姓就去。

6

羅波安的老父所羅門活的時，有跟隨佇伊面前的老人，羅波安王及議論，講：「恁有甚麼計策，我通回覆此個百姓。」

7

給伊講：「你若好款待此個百姓，互歡喜，用好話來應，就永遠做你的奴僕。」

8

總是伊拒絕老人所互伊的計策，及許個徛佇伊面前及伊平勻的少年人參詳，

9

給伊講：「此個百姓有對我講：『你的老父下佇阮的軛，求你互阮卡輕』；今恁有甚麼計策，互咱通回覆。」

10

許個及伊平勻的少年人講：「此個百姓對你講：『你的老父互阮背重的軛求你給阮減輕』；你著按呢應講：『我的尾指卡大我的老父的腰；

11

我的老父互恁背重的軛，我欲加添恁的軛；我的老父用鞭警戒恁，我欲用蠍仔蟲警戒恁。』」

12

第三日，耶羅波安及眾百姓到羅波安遐，照王所命令講「第三日閣來我遮」。

13

王用歹聲嗽應百姓，羅波安王放拺老人的計策，

14

照少年人的計策對講：「我的父互恁背重的軛，我欲加添恁的軛；我的父用鞭警戒恁，我欲用蠍仔蟲警戒恁。」

15

王無聽趁百姓；因為此個代誌是出佇上帝，互耶和華應驗伊託示羅人亞希雅對尼八的子耶羅波安所講的話。

16

以色列眾百姓看見王無聽趁，百姓就對王講：阮佇大衛有甚麼份額啊？阮及耶西的子無干涉！以色列啊，逐人倒去恁的布棚！大衛啊，著顧你家己的厝！對按呢，以色列眾人倒去的布棚。

17

總是徛起猶大諸個城的以色列人，羅波安猶原做的王。

18

羅波安王差管理做苦工的人哈多蘭去，以色列人就用石頭擲死伊。羅波安王就趕緊上車，欲走去耶路撒冷。

19

對按呢，以色列反叛大衛家，到今仔日。