哥林多後書 第 13 章 - 台語漢字羅馬本

1
此個是第三擺我欲到恁遐。「用二三個干證的人的嘴,逐句攏有憑準。」
2
我曾代先講的,今閣代先講伊,親像第二擺相及佇也現今相離開,給諸個從前犯罪的以及其餘的眾人講:「我若閣來,無欲寬恕。」
3
因為恁愛得著基督佇我來講話的憑據,伊向恁呣是軟弱,就是有權能佇恁中間。
4
伊對軟弱來受釘十字架,總是對上帝的權能來活。親像按呢阮佇伊也軟弱,總是對上帝向恁所顯明的權能,欲及伊相及活。
5
恁著試看本身有佇信抑無,著家己驗看。抑是呣知恁若呣是通棄拺的,就有耶穌基督佇恁?
6
阮也向望恁會知,阮呣是通棄拺的。
7
今阮求上帝,互恁所行無一項歹,呣是欲顯明阮做通接納的,是欲互恁的行做攏好,阮雖然做親像通棄拺的也通!
8
因為阮會做甚麼來逆真理,就是幫助真理。
9
阮軟弱,恁勇壯,阮就歡喜;阮所祈求的,就是互恁會完全。
10
因為按呢,我相離開的時,寫諸個互恁,通佇相見面的時,免照主所互我的權來用嚴法。此個權是欲起造,呣是欲捙倒。
11
兄弟啊,結尾來講:著歡喜。著完全;著受安慰;著同心;著和睦。就賞賜仁愛及平安的上帝欲及恁佇。
12
著用聖的相唚,來相請安。
13
諸個聖徒攏請安恁。
14
願主耶穌基督的恩典、上帝的疼痛、聖神的相通及恁眾人佇!

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!