哥林多後書 第 2 章 - 台語漢字羅馬本

1
我曾家己決斷無閣用憂悶就近恁。
2
因為我若互恁憂悶,就我所互伊憂悶的以外,是誰互我歡喜啊?
3
前我寫彼個互恁,免得我來的時,所應該互我歡喜的,反轉互我憂悶。因為我深信,恁眾人攏掠我的歡喜做恁眾人的。
4
前我心內苦痛迫切,流多多目屎,寫批互恁,呣是欲互恁憂悶,是欲互恁知我的疼恁是真大。
5
若有互人憂悶的,伊呣是互我憂悶若定,也大略是互恁眾人憂悶;免得我責備甚重。
6
親像此號人對許多人所受的責罰已經夠額;
7
所以反轉呣值著赦免伊,安慰伊,驚了彼號人憂悶過頭致到絕望。
8
所以我勸恁,用實實的憑據對伊顯明恁的仁愛。
9
因為按呢我也曾寫批來試驗恁,看恁凡事順趁抑無。
10
恁赦免人甚麼,我也赦免伊。因為我所有赦免的,若有赦免甚麼,是為著恁佇基督的面前來赦免的,
11
免得咱互撒但卡偏頭去,因為咱呣是呣知伊的計謀。
12
前我為著基督的福音到特羅亞,主也給我開門。
13
若是無抵著我的兄弟提多,所以我的心神無平安,就離別去馬其頓。
14
今感謝上帝!常常佇基督得勝,來做頭導阮也用阮佇逐所在顯明彼個對識基督才有的氣味。
15
因為對佇上帝,阮佇得救的人的中間以及沈淪的人的中間,做基督的芳味。
16
對諸個人,是做對死致到死的味;對許個,是做活致到活的味。諸個事是誰會堪得當?
17
因為阮無親像多多人,混雜上帝的道理;就是用誠實對上帝,佇上帝的面前佇基督來講。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!