哥林多後書 第 7 章 - 台語漢字羅馬本

1
所疼的兄弟啊,既然有諸個應允,咱著清氣本身,除去一切肉體、及神的垃墋,驚畏上帝,來完全成聖。
2
著開闊恁的心來接納阮。阮未曾剋虧人,未曾損壞人,未曾偏人。
3
我講按呢,呣是欲責罪恁。因為我已經有講,恁佇阮的心頭,同死同活。
4
我向佇恁大好膽,我為著恁大誇口,我滿心得著安慰;佇阮一切患難中我有格外的歡喜。
5
因為阮來到馬其頓的時,阮的肉體攏無平安,凡事抵著患難,外面有相爭,內面有驚。
6
總是安慰卑微的人的就是上帝,用提多到來安慰阮;
7
呣若用伊到,也是用伊對恁所受的安慰,來安慰阮;因為伊將恁的戀慕、恁的哀傷,恁向佇我的熱心,給阮講,致到我益發歡喜。
8
我曾用批互恁煩惱,前雖然有呣過心,今就無啦;因為我看彼張批互恁煩惱的不過是暫時。
9
今我歡喜,呣是因為恁煩惱,是因為恁有對煩惱致到反悔。因為恁煩惱是順上帝,互恁無一項對阮受剋虧。
10
因為順上帝的煩惱生出反悔,致到得著救,無有後來的退悔;若是世間的煩惱是致到死。
11
因為恁看,恁此個順上帝的煩惱,佇恁有生出偌大的殷勤、怎樣的家己分訴、怎樣的怨慼、怎樣的驚惶、怎樣的戀慕、怎樣的熱心、怎樣的責罰。恁佇此層事,已經逐項表明家己是清氣。
12
我前雖罔寫批互恁,呣是為著彼個剋虧人的,也呣是為著彼個受剋虧的,是欲互恁為著阮的殷勤佇上帝的面前對恁顯明。
13
所以,阮已經受安慰。閣佇安慰中,因為提多的歡喜就阮的歡喜益發充滿,因為伊的心對恁眾人來得著安息。
14
我若曾對伊誇口恁甚麼代誌,也就無見誚;因為阮對提多所誇口恁的話是真實,親像阮對恁所講的話也攏是真實。
15
閣伊記念恁攏順服,用驚惶愕愕惙接納伊,就伊的心益發向佇恁。
16
今我歡喜,因為論到恁,我凡事會放心得。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!