撒母耳記下 第 15 章 - 台語漢字羅馬本

1
此霎了後,押沙龍為家己備辦車馬,閣五十人走佇伊的頭前。
2
押沙龍早早起來,徛佇城門的路邊,若有人來有案件著互王判斷的,押沙龍就叫伊來,問伊講:「你是叨落一個城的人。」伊應講:「奴僕是以色列一個支派的人。」
3
押沙龍給伊講:「你的代誌是好是有情理,總是王無交代人聽你的話。」
4
押沙龍閣講:「可惜無設立我做此個地方的審判司!見有相告著判斷的事的來到我遮,我欲照公義判決伊。」
5
見有人近倚來拜伊,伊就伸手牽伊,給伊唚。
6
以色列人的中間,見若欲去見王求判斷的,押沙龍攏按呢款待。按呢,押沙龍暗靜得著以色列人的心。
7
過四年,押沙龍對王講:「求你准我去希伯崙,還我對耶和華所下的願。
8
因為奴僕踮佇亞蘭的基述,曾下願講:『耶和華若果然互我閣倒來耶路撒冷,我欲服事耶和華。』」
9
王給伊講:「你通平安去!」押沙龍就起來,去希伯崙。
10
押沙龍差偵探行遍以色列逐支派,講:「恁一下聽見哨角的聲就講:『押沙龍佇希伯崙做王啦!』」
11
押沙龍所請彼二百人及伊對耶路撒冷去,許個人攏是無意中去,呣知彼個事。
12
大衛的謀士亞希多弗是基羅人,當獻祭的時,押沙龍差人召伊,對伊的本城基羅來。對按呢叛逆的勢面愈強;因為隨押沙龍的百姓日日愈多。
13
有人來報大衛講:「以色列人的心攏歸向押沙龍啦。」
14
大衛給許個及伊佇耶路撒冷的人臣講:「起來,咱著逃走,若無攏會閃避押沙龍;著緊緊去,驚了伊緊緊到來著咱,陷害咱,用刀死城內的人。」
15
王的人臣給王講:「看啊,我的主我的王所注意的,你的奴僕攏欲行。」
16
王出去,伊的家眷攏隨伊,王留十個嬪妃顧厝。
17
王出去,眾百姓攏隨伊,到伯墨哈,就歇。
18
王的人臣攏佇伊的面前行過去。一切的基利提人、比利提人,及迦特人就是對迦特隨伊來的六百人,也攏佇王的面前行過去。
19
王給迦特人以太講:「你啥事及阮去?通倒去及王相及住,你是外邦人,遷徙佇外面,通倒去本所在!
20
你昨日才來,我今仔日豈通勞煩你及阮漂流啊?我去我所去的所在,你通倒去,帶你的兄弟相及倒去!願恩典誠實及你佇。」
21
以太應王講:「我指永活的耶和華,及我的主我的王的活命來咒誓:我的主我的王或活或死,見所佇的所在,你的奴僕也佇遐。」
22
大衛給以太講:「你去,過去!」迦特人以太及許個隨伊的人及所有的囝仔就攏過去。
23
遍地大聲啼哭,眾百姓攏過去,王也過汲淪溪;眾百姓過去,向曠野行。
24
撒督及攏總隨伊的利未人扛上帝的約櫃來,下上帝的櫃佇遐。亞比亞他上來,聽候眾百姓對城內出來攏過去。
25
王給撒督講:「你扛上帝的櫃倒去城內。我若得著恩典佇耶和華的目前,伊欲互我倒來,互我閣看見伊及伊徛起的所在。
26
設使伊講:『我無歡喜你』,看啊,我佇遮,願伊照伊看做好的行佇我!」
27
王閣給祭司撒督講:「你豈呣是先見嗎?你通安然倒去城內;你的子亞希瑪斯及亞比亞他的子約拿單,恁此二個子攏通及你去。
28
看啊,我佇曠野的渡口聽候對你遐有消息來報我知實情。」
29
對按呢撒督及亞比亞他扛上帝的櫃倒去耶路撒冷,就住佇遐。
30
大衛對上橄欖山的路上去,愈上去愈哮,罩頭殼褪赤腳來行。隨伊去的眾百姓也罩頭殼上去,愈上去愈哮;
31
有人報大衛講:「亞希多弗也隨押沙龍佇叛黨的中間。」大衛講:「耶和華啊,求你互亞希多弗的計謀變做戇!」
32
大衛上到山頂、敬拜上帝的所在,看見亞基人戶篩,衫拆裂,頭殼摻塵埃來迎接伊。
33
大衛給伊講:「你若及我去,會拖 我;
34
你若倒去城內,給押沙龍講:『王啊,我欲做你的奴僕;我前做你的父的奴僕,今我也欲按呢做你的奴僕。』你就通給我破壞亞希多弗的計謀。
35
祭司撒督及亞比亞他豈無及你佇遐嗎?你對王宮內所聽見的,就著給祭司撒督及亞比亞他講。
36
撒督的子亞希瑪斯,亞比亞他的子約拿單,此二個子也及佇遐。見若恁所聽見的通託仗來報我。」
37
對按呢,大衛的朋友戶篩入城;押沙龍也入耶路撒冷。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!