撒母耳記下 第 19 章 - 台語漢字羅馬本

1
有人給約押講:「看啊,王為著押沙龍啼哭悲哀。」
2
彼日的得勝變做眾百姓的悲哀,因為彼日百姓聽見講王為著伊的子憂悶。
3
彼日百姓暗靜入城,親像佇陣裡逃走、見誚的百姓暗靜入來一樣。
4
王罩伊的面,王大聲哮講:「我的子押沙龍啊!押沙龍,我的子,我的子啊!」
5
約押入厝去見王,講:「你今仔日互你一切的奴僕無體面!今仔日救你的生命及你的子查某子的生命,你許個某的生命,你許個細姨的生命,
6
因為怨恨你的你疼伊,疼你的你怨恨伊。你今仔日已經顯明你無要緊許個首領及人臣。我今仔日看出,若押沙龍活,阮今仔日攏死,你就歡喜。
7
今你著起來出去,安慰你的奴僕的心。我指耶和華來咒誓:你若無出去,今暝無一人及你佇;這災禍比你對少年到今所抵著的卡慘!」
8
王就起來,坐佇城門裡。有人給眾百姓講:看啊,王坐佇城門裡,百姓就攏到王的面前。以色列人已經逃走,逐人倒去伊的布棚。
9
以色列眾支派的人紛紛議論講:「王曾救咱脫離對敵的手,閣救咱脫離非利士人的手,今伊閃避押沙龍走佇外面。
10
咱用油抹押沙龍治理咱,伊已經陣亡。恁今啥事呣出一句請王倒來啊?」
11
大衛王差人去見祭司撒督及亞比亞他,講:「恁著給猶大的長老講:『以色列眾人已經有話到佇王,請王倒來伊的厝,恁請王倒來啥事做人的路尾啊?
12
恁是我的兄弟,是我的骨肉,請王倒來啥事做人的路尾啊?』
13
也給亞瑪撒講:『你豈呣是我的骨肉嗎?我若無設立你替約押長長佇我的面前做軍長,願上帝加倍責罰我!』」
14
對按呢伊就感激猶大眾人的心,親像一人的心。就差人去見王,講:「願你及你的眾人臣倒來。」
15
王就倒來,到約但。猶大人來到吉甲,欲迎接王,導王過約但。
16
巴戶琳的便雅憫人、基拉的子示每趕緊及猶大人落來迎接大衛王。
17
及伊來的有一千個便雅憫人,也有掃羅家的奴僕洗巴及伊十五個子,二十個奴僕;攏佇王的面前過約但。
18
有渡船過去,載王的家眷,出在王用。王過約但的時,基拉的子示每就仆佇王的面前,
19
給王講:「我的主我的王出耶路撒冷的日,你的奴僕行悖逆的事;今求我的主莫得責罪我,莫得記得,王也莫得下佇心裡。
20
你的奴僕明明知家己有罪,所以約瑟全家,今仔日我第一代先落來迎接我的主我的王。」
21
洗魯雅的子亞比篩講:「示每曾咒詛耶和華所抹油者,豈呣著因為按呢互伊死嗎?」
22
大衛講:「洗魯雅的子啊,我及恁甚麼干涉,互恁今仔日反對我啊?今仔日以色列中豈通互人死嗎?我豈呣知我今仔日做以色列王嗎?」
23
對按呢王給示每講:「你呣免死。」王就對伊咒誓。
24
掃羅的孫米非波設也落去迎接王。伊對王去的日,到王平安倒來的日,伊無修整腳,也無修整嘴鬚,也無洗衫。
25
伊佇耶路撒冷迎接王的時,王給伊講:「米非波設,你啥事無及我落去?」
26
伊應講:「我的主我的王啊,當時你的奴僕想講我欲備辦驢騎伊,及王相及去,因為你的奴僕是跛腳,總是我的奴僕騙我,
27
閣佇我的主我的王的面前誹謗你的奴僕。獨獨我的主我的王親像上帝的使者,照你所看做好的行伊。
28
因為我的祖全家,佇我的主我的王的面前攏是著死的人,總是你互你的奴僕及你一桌的人相及食,我猶有甚麼理由通閣對王求叫啊?」
29
王對伊講:「你啥事閣講你的代誌啊?我講,你及洗巴著平分許個業產。」
30
米非波設給王講:「我的主我的王已經平安倒來宮內,據在伊攏提去也通。」
31
基列人巴西萊對羅基琳落來,欲送王過約但,就及王過約但。
32
巴西萊真老,已經八十歲。王住佇瑪哈念的時,伊用食物供給王;因為伊是大好額人。
33
王給巴西萊講:「你及我過去,及我住耶路撒冷,我欲供給你。」
34
巴西萊給王講:「我的生命猶有幾年幾日,互我及王相及上耶路撒冷啊?
35
我現今已經八十歲啦,猶會分別好歹嗎?你的奴僕猶會試飲食的滋味嗎?唱歌的男女我會曉聽伊的聲音嗎?奴僕啥事拖累我的主我的王啊?
36
你的奴僕只有是欲及王過約但一站仔,王啥事著用此個報賞報賞我啊?
37
求你准你的奴僕倒去,互我通死佇我的本城,我的父母的墓遐,看啊,你的奴僕金罕佇遮,互伊及我的主我的王過去,照你所看做好的款待伊。」
38
王講:「金罕通及我去,我欲照你所看做好的來款待伊。你見有對我求的,我欲給你成。」
39
對按呢眾百姓過約但,王也過去。王就及巴西萊唚嘴,給伊祝福,伊就倒去伊本所在。
40
對按呢王過去,到吉甲,金罕也及伊過去。猶大眾百姓及以色列百姓的一半也攏送王過去。
41
以色列眾人來見王,給伊講:「阮的兄弟猶大人啥事偷你去,來導王及伊的家眷,及跟隨大衛的人,攏相及過約但?」
42
猶大眾人應以色列人講:「因為王及阮是同宗,恁啥事因為此個事受氣啊?阮曾食著王甚麼啊?王曾用甚麼送阮嗎?」
43
以色列人應猶大人講:「照支派,此個王阮有十份;阮對佇大衛比恁卡有關係。恁啥事看輕阮,導阮的王倒來無代先及阮參詳啊?」獨獨猶大人的話比以色列人的話卡硬。

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!