撒母耳記下 第 20 章 - 台語漢字羅馬本

1
佇遐抵當有一個匪類,是便雅憫人比基利的子,名叫示巴。伊歕哨角,講:「阮對佇大衛無份,阮對佇耶西的子無干涉。以色列人啊,恁逐人倒去恁的布棚!」
2
對按呢以色列眾人攏離開大衛,去隨比基利的子示巴。獨獨猶大人對約但到耶路撒冷,攏隨伊的王住住。
3
大衛到耶路撒冷,入伊的王宮,王將前所留顧厝的十個嬪妃關禁佇別間厝,供給食用,無及親近。受關禁親像寡婦,直到死的日。
4
王給亞瑪撒講:「你著佇三日內給我招集猶大人來,你也著來遮。」
5
亞瑪撒就去招集猶大人,總是伊延延過所限的期。
6
大衛給亞比篩講:「今比基利的子示巴欲害咱比押沙龍卡傷重。你著帶你主人的奴僕追伊,驚了伊得著堅固的城,閃避咱。」
7
約押的人及基利提人、比利提人,及眾勇士,攏出去隨亞比篩,對耶路撒冷出去追比基利的子示巴。
8
到基遍的大石磐遐,亞瑪撒來到的面前。彼時約押所穿的戰甲,縖佇伊的身軀,外面有帶閣有劍縛佇腰裡,插佇鞘內;伊行的時,劍對鞘裡落出來。
9
約押給亞瑪撒講:「我的兄,你平安嗎?」約押就用正手捋亞瑪撒的嘴鬚,欲及伊唚嘴。
10
亞瑪撒無張持約押手裡所抬的劍;約押用彼支刺入伊的腹肚,互伊的腸仔流佇地裡,無閣鑿伊,就死。約押及伊的小弟亞比篩去追比基利的子示巴。
11
約押的少年人中有一個徛佇彼邊仔,講:「是誰歡喜約押,是誰歸順大衛,就著隨約押去。」
12
亞瑪撒佇路中翱佇伊的血裡。彼人看見眾百姓攏停腳,就將亞瑪撒對路中徙到田裡,用衫蓋伊,因為看見到許個人攏停腳。
13
身屍對路中徙去以後,眾百姓就攏隨約押去追比基利的子示巴。
14
伊遍行以色列諸個支派,直到伯瑪迦的亞比拉,及比利人;也聚集來隨伊。
15
到伯瑪迦的亞比拉,圍困伊,就佇城外起土堆,起佇外城的對面;約押及隨伊的眾百姓撞城,欲互伊倒。
16
有一個聰明的婦仁人對城裡叫講:「聽啊,聽啊,求恁給約押講,請你來遮,我欲及你講話。」
17
伊就行倚來,婦仁人講:「你是約押抑呣是?」伊應講:「我是啦。」婦仁人講:「求你聽女婢的話。」應講:「我聽。」
18
婦仁人講:「古早人常常講,著佇亞比拉請問,代誌才會解決。
19
阮佇以色列中是和平、忠厚的。你想欲滅以色列中一個府城,你啥事愛吞滅耶和華的產業啊?」
20
約押應講:「我決斷呣愛吞,決斷呣愛滅,
21
代誌呣是按呢,不過是因為以法蓮山地有一個人──比基利的子名叫示巴──有起手攻擊王就是大衛,若將伊一人交出,我就離開此個城。」婦仁人給約押講:「你看,伊的頭殼欲對城頂互你。」
22
婦仁人就照伊的智慧勸眾人。就斬比基利的子示巴的頭殼,互約押。伊就歕哨角,眾人就離開城四散,逐人倒去伊的布棚。約押倒去耶路撒冷,到王遐。
23
約押做以色列的總軍長;耶何耶大的子比拿雅管轄基列提人及比利提人;
24
亞多蘭管理做王的工的;亞希律的子約沙法做史官;
25
示法做秘書;撒督及亞比亞他做祭司;
26
睚珥人以拉做大衛的領袖。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!