提摩太後書 第 4 章 - 台語漢字羅馬本

1
我佇上帝的面前,及欲審判活人死人的基督耶穌的面前,為著伊的顯現及伊的閣來,吩咐你:
2
著傳道理,無論得時不得時,著專務伊;用百般的寬容、教示、來責備、警戒、勸勉。
3
因為時日欲到,人欲呣容允端正的教示,欲耳孔癢,愛聽多多先生,照家己的私慾,
4
閣越頭呣聽真理,去向無影的話。
5
獨獨你凡事著節制,忍受艱苦,行傳福音者的工,來盡你的職份。
6
因為今我的血做灌奠,我過世的期到啦。
7
我已經爭戰好的爭戰,已經盡跑走的路站,已經守所信的道理。
8
今了後,有義的冕旒給我備辦下,就是主做公義的審判司佇彼日欲互我;呣若互我,也欲互見若欣慕伊顯現的人。
9
你著致意緊緊來尋我。
10
因為底馬欣慕此個世間,就離開我,去帖撒羅尼迦,革勒士去加拉太,提多去撻馬太,
11
只有路加及我佇。著導馬可及你相及來,因為伊佇服事的工有利益我。
12
推基古我已經差伊去以弗所。
13
我佇特羅亞留佇加布兜的外衫,你來的時著續帶來,也著帶許個冊,許個羊皮的閣卡要緊。
14
拍銅師傅亞力山大多多項害我;主欲照伊的所行來報應伊。
15
你也著張持伊,因為伊不止對敵阮的話。
16
我頭一擺分訴的時,無人倚近我,眾人攏離開我;願此個罪無歸佇。
17
若是主徛佇我身邊,互我勇健,互所著宣傳的對我來一盡報揚,閣互外邦攏聽見;我也得著救出佇獅的嘴。
18
主欲救我脫離攏總的歹代,也欲救我入佇伊天裡的國。願榮光歸伊,到代代無盡。阿們。
19
請安百基拉、亞居拉,及阿尼色弗的家。
20
以拉都佇哥林多。特羅非摩破病,我留伊佇米利都。
21
著致意佇冬天前來。友布羅、布田、利奴、革老爹,及眾兄弟攏請安你。
22
願主及你的神佇。願恩典及恁佇!

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!