使徒行傳 第 17 章 - 台語漢字羅馬本

1
經過暗妃坡里、亞波羅尼亞,到帖撒羅尼迦,佇遐有猶太人的會堂。
2
保羅照平常的款入去就近,佇三個安息日,
3
引起聖經及辯論,開拆指明基督應該受害,對死人中復活;閣講:「我所對恁傳的耶穌就是基督。」
4
中間有的受苦勸,就歸倚保羅、西拉,閣有敬虔的希利尼人不止多,尊貴的婦仁人亦無少。
5
獨獨猶太人怨妒,招街市的匪類幾若人,教唆百姓歸群聚集,擾動通城攻入耶孫的厝,愛掠出來交互百姓。
6
無抵著,就拖耶孫及幾若個兄弟送互地方官,叫講:「諸個拍亂天下的人亦到遮,
7
耶孫接納。諸個人攏違逆該撒的命令,講有別個王耶穌。」
8
眾百姓及地方官聽見這,就驚惶;
9
已經收耶孫及其餘的人的保狀,就放。
10
對按呢兄弟隨時差保羅、西拉透暝去庇哩亞。二人已經到地,就入猶太人的會堂。
11
許個人比帖撒羅尼迦人卡文明,因為注意受道理,逐日查考聖經,看諸個事果然有按呢抑無。
12
所以其中有多多人信,閣有希利尼尊貴的婦仁人,及查甫人無少。
13
獨獨帖撒羅尼迦的猶太人知保羅佇庇哩亞傳上帝的道理,就到遐,搖動攪擾眾人。
14
兄弟連鞭差保羅去到海邊,獨獨西拉、提摩太猶原住遐。
15
送保羅的人導伊到雅典,受命令,叫西拉、提摩太緊緊就近伊,就倒去。
16
保羅佇雅典聽候,看見滿城攏是偶像,就傷心著急;
17
所以佇會堂及猶太人以及敬虔的人辯論,逐日佇街市裡及所抵著的亦是按呢。
18
有彼壁古羅、斯多亞二教門的哲士,及伊辯論。有的講:「此個拾人的話粕的欲講甚麼?」有的講:「伊是親像傳別邦國的鬼神的。」是因為伊傳耶穌及復活的道理。
19
就導伊到亞略山,講:「你所講新的教,通得著知嗎?
20
因為你用奇怪的事傳入阮的耳孔,所以阮愛知許個是甚麼意思。」
21
(雅典人及遐的出外人顧得別項事,獨獨是將新的事來講來聽若定)。
22
保羅徛佇亞略山中,講:「雅典人啊,我看恁凡事敬畏神明嶄然熱心。
23
因為我行遊的時,看見恁所敬拜的,抵著一座壇,頂面寫講『未識的上帝』。恁所未識來敬拜的,我用伊來給恁講。
24
彼個創造世間及其中萬物的上帝,既然是天地的主,無徛起手造的殿,
25
無互人的手服事,那親像伊有所欠缺;是家己用活命、喘氣,及萬物互眾人。
26
閣創造萬邦的人對一個本源,徛起佇全地面,閣給限代先定著的時期及所徛起的地界,
27
是欲互尋上帝,豈採通揣摩來得著,其實伊離開咱逐人無遠;
28
因為咱佇伊來活、來振動,來佇。親像恁中間做詩的人,有的有講:『因為咱諸個亦是伊的子類。』
29
今既然是上帝的子類,就呣應該掠做上帝的本質,親像金、銀、石,人的工夫人的心事所雕琢的。
30
許個呣知影的時代,上帝無窮勘,今就命令逐所在的人攏總著反悔。
31
因為有定著一日,欲用伊所設立的人照公義審判天下,是對死人中互伊復活,互眾人有憑據通信。」
32
聽見死人復活的話,有的笑伊;有的講:「阮欲閣聽你講這!」
33
對按呢保羅對中間出去。
34
若是有幾若人倚伊,來信,中間有亞略山的會員丟尼修,及一個婦仁人,名叫大馬哩,閣也有別人。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!