使徒行傳 第 27 章 - 台語漢字羅馬本

1

已經定著意思，互阮過海去意大利，就將保羅及另外幾若個犯人交互西巴斯督營的百總，名猶流。

2

有亞大米田的船，欲行到亞西亞海墘幾若所在，阮就搭伊起身；有馬其頓的帖撒羅尼迦人亞里達古及阮去。

3

隔日，到西頓；猶流好款待保羅，准伊就近諸個朋友，受的照應。

4

對遐開船，因為對頭風的緣故，就對居比路下勢經過。

5

已經過基利家、旁非利亞的海，到呂家的每拉。

6

佇遐，百總抵著亞歷山大的船，欲去意大利的，就教阮搭伊。

7

行真慢，多多日才僅仔到革尼土對面。因為風阻擋，就閃革哩底下，對撒摩尼過。

8

僅僅仔會通沿岸，行到一所在，名佳澳；近遮有拉西亞的城。

9

歷過多多日，禁食的期已經過，行船危險，保羅勸講：

10

「大家啊，我看此擺行船，呣若貨物及船，連咱的生命亦欲受害及大損失。」

11

若是百總信舵公及船主，卡過頭佇保羅所講的。

12

閣佇此個垵澳過冬天呣利便，大半的人，想愛開船離開遮，看會通到非尼基過冬天。彼位就是革哩底一個垵澳，一面向東南，一面向東北。

13

此時，南風微微仔來，眾人掠做得意，就起碇，倚革哩底岸來行。

14

無偌久，狂風對海嶼頂拍落來；彼個風名「友拉居崙」。

15

船互風掃，接載住，就出在伊漂流。

16

駛到小海嶼下，名叫高大，僅僅會收舢舨起來。

17

舢舨已經收起來，就用方法捆縳船底，閣驚了靠著賽耳底的沙汕就落帆，互風押去。

18

阮互風湧大搖簸，隔日就用貨物落海。

19

第三日，閣親手擲船裡的器具。

20

日及星多多日無出現，閣互風湧拍不止殄，阮得救的向望就攏無啦。

21

眾人久久無食，保羅徛佇中間，講：「大家啊，恁前著聽我的話，莫得開船離開革哩底，來抵著此號傷害及損失。

22

今我勸恁安心，因為恁中間無一人會失落生命，獨獨失落船若定。

23

因為我所屬所服事的上帝，伊的天使昨暝徛佇我身邊，講：

24

『保羅，呣免驚；你的確著徛佇該撒的面前，看啊！上帝用船內的人攏總賞賜你。』

25

所以，大家啊，恁著安心，因為我信上帝，代誌欲照伊所給我講的。

26

若是咱諸個的確靠佇一個海嶼。」

27

到第十四暝，阮漂流佇亞底亞海。約略半暝，水手掠做近山，

28

拍水鉈，得著二十尋；略略仔進前，閣拍水鉈，得著十五尋。

29

驚了犁著石，就佇船尾拋四弓碇，切切向望天光。

30

水手愛欲離開船逃走，放舢舨落海，假做欲對船頭拋碇。

31

保羅對百總及兵丁講：「諸個人無佇船裡，恁會得救。」

32

兵丁就斬斷舢舨的索，出在伊家己墜落。

33

到天欲光，保羅勸眾人著食，講：「恁大家瞭望，　枵，呣成食，今仔日是第十四日啦。

34

所以勸恁著食，這是關係恁的得救；因為恁無一人會失落一支頭毛。」

35

講息，提餅，當眾人的面前感謝上帝，擘破來食。

36

對按呢眾人攏安心，亦逐個食。

37

阮佇船裡的計共二百七十六人。

38

已經食飽，麥落海，互船卡輕。

39

到天光，呣識彼個所在，獨獨看見一個海灣，有沙坡，就相及計謀看會互船犁上頂面抑。

40

就棄拺諸個碇，放佇海裡；也解開吊船舵的索起頭帆，互伊食風向沙坡進前。

41

抵著雙夾流的位，船就靠淺；船頭咬住振動，船尾互大湧摔破。

42

兵丁的意思欲諸個犯人，驚了有的泅走。

43

獨獨百總愛救保羅，阻擋所計謀，命令會泅的人，代先落水上山；

44

其餘的人有的用板，有的用船內的物。對按呢，眾人攏得救上山。