但以理書 第 4 章 - 台語漢字羅馬本

1
尼布甲尼撒王頒詔互天下諸個百姓、諸個國、諸個腔口的人講:「願恁大享受平安!
2
至高的上帝所行佇我的神蹟奇事,我歡喜宣佈。
3
大啊,伊的神蹟!豐盛啊,伊的奇事!伊的國是永遠的國;伊的權柄到代代!
4
「我──尼布甲尼撒佇我的厝,安然徛起佇我的王宮宴樂。
5
我夢見一個夢,互我驚惶。我佇眠床裡的思想,及心內的異象,互我迫腹。
6
所以我出令召巴比倫一切智慧的人到我的面前,教解明彼個夢互我知。
7
對按呢許個博士、術士、迦勒底人、占卜者攏入來,我將彼個夢當面給講,總是無解明互我知。
8
路尾有但以理,照我的上帝的名稱做伯提沙撒的,到我的面前,伊的心內有諸個聖的上帝的神,我用夢給伊講:
9
『博士長伯提沙撒啊,因為我知你的心內有諸個聖的上帝的神,無一項祕密的事互你為難。今著將我夢中所看見的異象及伊的解明來給我講。』
10
「我佇床裡心內的異象是諸個:我看,看見地的中間有一欉樹,極其高。
11
彼欉樹漸漸大,閣堅固,高到抵天,地的極頭也會看見,
12
伊的葉茂盛,果子真多,彼內面有眾生的食物;田野的走獸住佇伊的蔭影,空中的飛鳥歇佇伊的枝;見有血氣者對伊得著食。
13
「我佇眠床,佇我心內的異象,看見有一個守望閣是聖者對天落來。
14
大聲叫講:『剉彼欉樹!砍伊的枝!搖落伊的葉!拍散伊的果子!互走獸離開伊的下面,互飛鳥離開伊的枝。
15
總是著留伊的根頭佇地裡,用鐵及銅的環縛伊佇田裡新發的草中,用天的露水濕 伊,也互伊及走獸有份佇地上的草場,
16
互伊的心,變做呣是人的心,也用獸的心互伊,互伊歷過七個時期。
17
這是諸個守望者所定著的命,諸個聖者所出的令,互眾生知至高者掌管人的國,也照家己的意思用國賞賜人,也用至微細的人設立做主。』
18
「這是我──尼布甲尼撒王所看見的夢。伯提沙撒啊,你著解明伊;因為我國內一切智慧的人,攏會解明互我知,只有你會,因為恁心內有許個聖的上帝的神。」
19
彼時稱做伯提沙撒的但以理卬愕有許久,心內迫腹。王對伊講:「伯提沙撒啊,呣免為著彼個夢及伊的解明來迫腹。伯提沙撒就應講,願彼個夢歸佇怨恨你的,彼個解明歸佇你的對敵。
20
你所看見的樹漸漸大,閣堅固,高到抵天,地的極頭也會看見;
21
伊的葉茂盛,伊的果子真多,彼內面有眾生的食物;田野的走獸住佇伊的下面;空中的飛鳥歇佇伊的枝。
22
「王啊,此欉樹就是你。你漸漸大閣堅固,你的強大漸漸進步到抵天,你的權柄到佇地極。
23
王既然看見有一個守望閣是聖者對天落來,講:『著剉彼欉樹來毀壞伊,總是著留伊的根頭佇地裡,用鐵及銅的環縛伊佇田裡新發的草中,用天的露水濕 伊,也互伊及走獸有份,歷過七個時期。』
24
「王啊,彼個解明是按呢:閣至高者的命令欲到我的王,我的主也是按呢。
25
你欲受趕出離開人,及田野的走獸相及徛起,也欲互你食草親像牛,互天的露水濕 ,也欲歷過七個時期。到你知至高者掌權人的國,也照家己的意思用國賞賜人。
26
既然吩咐樹的根頭著留,到你知諸個天掌權的時,就你的國必定閣歸佇你。
27
王啊,今求你歡喜接納我的苦勸,用行公義來斷絕你的罪過,用憐憫喪鄉人來除去你的過失,豈採你的平安會久長。」
28
諸個事攏應驗佇尼布甲尼撒王。
29
到十二月滿,伊行遊佇巴比倫的王宮。
30
王講:「這豈呣是大的巴比倫,我用我大力的權,也為著我的威嚴的榮光來起的,做本國的宮殿嗎?」
31
此個話猶久佇王的嘴的時,有聲對天落來,講:「尼布甲尼撒王啊,有話給你講,國位已經離開你啦。
32
你欲受趕出離開人,及田野的走獸相及徛起,也欲互你食草親像牛,也欲歷過七個時期。到你知至高者掌管人的國,也照家己的意思用國賞賜人。」
33
就彼時代誌應驗佇尼布甲尼撒,伊受趕出離開人,食草親像牛,身軀互天的露水濕 ,到伊的毛發,親像鷹鳥的毛;伊的指甲長,親像鳥的爪。
34
許個時日已經滿,我──尼布甲尼撒抬目向天,我的靈性就閣復倒,我就祝謝至高者,謳咾尊榮永活者。因為伊的權是永遠的權;伊的國到代代。
35
地上徛起的百姓伊看做無;佇天裡的軍隊及地上徛起的百姓中,伊攏照家己的意思行代誌。無人會阻擋伊的手,抑是問伊講,你做甚麼啊?
36
彼時,我的靈性閣復倒,我的威嚴、榮耀閣歸佇我,做我的國的榮光;我的謀士及大臣也來朝見我。我的國位閣堅固,大權柄閣加添佇我。
37
今我──尼布甲尼撒謳咾尊敬、稱呼天頂的王;因為伊所做的攏真實,伊所行的攏公平。許個行佇驕傲者,伊會給降低。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!