但以理書 第 9 章 - 台語漢字羅馬本

1
瑪代族亞哈隨魯的子大利烏立做迦勒底國的王元年,
2
就是伊坐位的元年,我──但以理對冊裡得著知許個年的數額,就是耶和華的話臨到先知耶利米講起耶路撒冷抵著荒廢著滿七十年。
3
我決意向主上帝愛用祈禱懇求,禁食,穿麻衫,摻火灰來尋伊。
4
我祈禱耶和華──我的上帝、認罪,講:「主至大通驚畏的上帝啊,就是守約施恩互見若疼伊,謹守伊誡命的人的。
5
阮有犯罪,作孽,行歹,背叛,離開你的誡命法度,
6
無聽你的奴僕諸個先知就是奉你的名對阮的君王、貴族、列祖,及國內一切的百姓講話者。
7
主啊,公義歸佇你,見誚歸佇阮;親像今仔日,就是歸佇猶大人及耶路撒冷的百姓,以及以色列眾人,或是近的,或是遠的,佇你為著得罪你,來趕到的逐國。
8
主啊,見誚歸佇阮,歸佇阮的君王、貴族、列祖,因為阮得罪你。
9
阮雖然悖逆主──阮的上帝,總是憐憫赦罪是在佇伊,
10
也無聽耶和華──阮的上帝的話,來行伊託仗伊的奴僕諸個先知所排列佇阮的面前的律法。
11
以色列全族攏有犯著你的律法,行偏路無聽趁你的話;因為按呢,此個咒詛以及上帝的奴僕摩西律法中所指的咒誓攏傾佇阮的身上,因為阮有得罪你。
12
伊曾降大災禍互阮,來應驗伊前警戒阮也警戒審判阮士師的話;因為佇普天下呣曾行親像所行佇耶路撒冷的。
13
這一切的災禍臨到阮,是照摩西律法中所記載的,總是阮猶無求耶和華──阮的上帝施恩,互阮越頭離開阮的罪過,明白你的真理。
14
所以耶和華注意互此個災禍臨到阮,因為耶和華──阮的上帝佇伊所行的事攏是公義;阮並無聽趁伊的話。
15
主──阮的上帝啊,你曾用大權能的手帶你的百姓出埃及地,互你有名聲,親像今仔日。阮有犯罪,阮有行歹。
16
主啊,求你照你的公義互你的受氣及你的大受氣越轉離開你的城耶路撒冷,就是你的聖山。因為對阮的罪惡及阮列祖的罪過,耶路撒冷及你的百姓互四圍的人所凌辱。
17
所以阮的上帝啊,今求你聽你的奴僕的祈禱懇求,閣因為主的緣故,互你的面的光照你拋荒的聖所。
18
我的上帝啊,求你俯耳孔來聽,開你的目睭來看阮拋荒的地及用你的名來稱的城。因為阮獻阮的祈禱佇你的面前,呣是因為家己的義,就是因為你的大憐憫。
19
主啊,聽,主啊,赦免,主啊,聽來行,我的上帝為你的緣故莫得延延。因為你的城、你的百姓攏是用你的名來稱的。」
20
我講祈禱的時,認我的罪及我的百姓以色列的罪,為著我的上帝的聖山,獻我的懇求佇我的上帝──耶和華的面前。
21
我祈禱的話講未完,我起頭佇異象中所看見的人加百列,奉命令緊緊飛來,約略佇獻下昏祭的時來摸我。
22
伊教示我給我講:「但以理啊,我來是欲互你有智慧、聰明。
23
你起頭祈禱的時,就有命令發出,今我來給你講,因為你大大得著寵愛;所以你著想此個事來明白此個異象。
24
「論到你的百姓及你的聖城,已經限定七十個七日期。欲遏止過失,除盡罪惡,救贖罪過,引進永遠的義,封密異象及讖語,閣用油抹至聖者。
25
所以你著知,著明,對出命重新起造耶路撒冷,直到受抹油的人君的時,欲有七個七日期閣六十二個七日期。當佇艱難的時,伊及街路及濠溝攏欲閣起造。
26
過六十二個七日期的了後,受抹油者欲抵著剪除,也攏無所有;欲有一個人君的百姓到來毀滅城及聖所,伊的結局欲親像用大水。到路尾欲有交戰,拋荒的事已經定著。
27
一個七日期的內面,伊欲及多多人立堅固的約;七日期的一半,伊欲互祭祀及禮物攏息。殘害者借可惡者的翅來,閣有大受氣傾佇彼個行毀滅者的身上,到佇所定著的末期。」

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!