申命記 第 16 章 - 台語漢字羅馬本

1
「你著注意亞筆月,來守耶和華──你上帝的過節,因為耶和華──你上帝佇亞筆月暝時導你出埃及。
2
你著佇耶和華所欲揀來安置伊的名的所在,對你的羊群牛群,用逾越節的精牲,獻祭互耶和華──你的上帝。
3
你呣通用有酵的餅參食;七日久你著用無酵的餅參食,就是困苦的餅──欲互你一生的日記得你出埃及地的日──因為你出埃及地的時真趕緊。
4
佇你的四境內,七日久攏呣通看見酵,頭一日下昏所獻的祭肉,呣通留一點仔到天光。
5
佇耶和華──你上帝所賞賜許個城門內,你呣通獻過節的祭;
6
獨獨著佇耶和華──你上帝所欲揀做安置伊的名的所在,到下昏日落的時,就是你出埃及的時,著獻過節的祭。
7
著佇耶和華──你上帝所欲揀的所在來食伊,隔早起你越倒去你的布棚。
8
你著食無酵餅六日,第七日你著守耶和華──你上帝的嚴肅會,攏呣通做工。」
9
「你著為家己算七個七日:對你起頭用鐮仔割五穀的時,就算七個七日。
10
你著佇耶和華──你上帝的面前守七七日節,將你的手的禮物奉獻,是照你的心所願的,也照耶和華──你的上帝賜福你的。
11
你及你的子、查某子、奴僕、女婢,及踮佇你城門內的利未人,以及佇恁中間寄腳的及孤兒寡婦,攏著佇耶和華──你的上帝所欲揀安置伊的名的所在,佇耶和華──你上帝的面前歡喜。
12
你著記得你佇埃及曾做奴才。你著執守來行諸個律例。」
13
「五穀場及酒窟所出的,你收囥了後,著守搭草寮仔節七日。
14
守節的時,你及你的子、查某子、奴僕、女婢,及踮佇你城門內的利未人,以及寄腳的及孤兒寡婦,攏著歡喜。
15
佇耶和華所欲揀的所在,你著守耶和華──你的上帝的節七日;因為耶和華──你的上帝佇你一切的物產及你的手一切所做的欲賜福你,你就真大歡喜。
16
你一切的查甫丁著佇除酵節、七七節、搭寮仔節,一年三擺,攏到耶和華──你上帝的面前,佇伊所欲揀的所在,也呣通空手到耶和華的面前。
17
逐人著照伊的氣力來獻,就是照耶和華──你上帝所賞賜你的福份。」
18
「你著佇耶和華──你的上帝所賞賜逐個城門內,照你許個支派為家己設立審判官及官長。著照公義的判斷來審判百姓。
19
你的審判呣通冤枉;呣通看人的外貌。也呣通受賄賂;因為賄賂會互智慧的人目睭睛暝,閣會互義人的話反倒轉。
20
你著追至公至義,互你會活,承接耶和華──你上帝所賞賜你的地。
21
「你為家己所起耶和華──你上帝的壇,呣通佇彼邊仔栽甚麼樹木做亞舍拉。
22
也呣通為家己祀雕刻的柱;這是耶和華──你的上帝所怨恨的。」

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!