申命記 第 30 章 - 台語漢字羅馬本

1
「諸個代誌就是我所排列佇你的面前的祝福及咒詛將來到佇你;你佇耶和華──你上帝所趕你到的列國中,你的心記得伊;
2
你及你的子孫若盡心盡性歸向耶和華──你的上帝,聽趁伊的話,照我今仔日一切所命令你的;
3
就耶和華──你的上帝欲互你受掠的人倒轉來,欲憐憫你;欲倒轉來聚集,你對耶和華──你上帝所四散你到的列國來。
4
你受趕逐的,若有佇天邊的,耶和華──你的上帝也欲對遐聚集你帶你對遐倒來。
5
耶和華──你的上帝欲導你入你的列祖所承接的地,你也承接伊;伊也欲好款待你,互你的人額加添比你的列祖卡多。
6
耶和華──你的上帝欲佇你的心及你的後裔的心行割禮,互你盡心盡性疼耶和華──你的上帝,互你通得著活。
7
耶和華──你的上帝欲將這一切的咒詛下佇你的對敵及怨恨你、窘迫你的人的身上。
8
你欲倒轉聽趁耶和華的話,行伊一切的誡命,就是我今仔日所命令你的。
9
你若聽趁耶和華──你上帝的話,執守此個律法所記的誡命律例,閣盡心盡性歸向耶和華──你的上帝,耶和華──你的上帝欲互你的手所做一切的事,及你的身軀所生的,精牲所出的,土地所出的,充足有剩;因為耶和華欲閣歡喜你,賜福你,親像前歡喜你的列祖一樣。
10
(見申30:9)。
11
「因為我今仔日所命令你的誡命呣是你所做到的,也無佇遠遠;
12
呣是佇天裡,致到你講:『是誰為阮上天帶來阮遮,互阮聽來行伊啊?』
13
也呣是佇海外,致到你講:『是誰為阮過海帶來阮遮,互阮聽來行伊啊?』
14
此個話及你真近,就是佇你的嘴佇你的心,互你通來行伊。
15
「看啊,我今仔日有用活及福氣,死及災禍,排列佇你的面前。
16
就是我今仔日命令你疼耶和華──你的上帝,行伊的道路,守伊的誡命、律例、法度,互你通活,加添人額,耶和華──你上帝就欲佇你所欲入去承接的地賜福你。
17
設使你的心悖謬,呣聽趁,閣受誘惑去敬拜別個上帝服事伊,
18
我今仔日就明明給恁講,恁的確欲滅無;佇你過約但入去承接的地,你的日子會久長。
19
我今仔日叫天叫地對恁做干證;我用生死祝福咒詛排列佇你的面前,所以你著揀活命,互你及你的後裔攏會活;
20
來疼耶和華──你的上帝,聽伊的話,結聯佇伊;因為伊是你的活命,你的日子久長也在佇伊。互你通徛起佇耶和華對你的列祖亞伯拉罕、以撒、雅各咒誓所欲賞賜的地。」

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!