以弗所書 第 1 章 - 台語漢字羅馬本

1
對上帝的旨意,做基督耶穌的使徒保羅,批寄互以弗所諸個聖徒,忠信佇基督耶穌的。
2
願恁對咱的父上帝及主耶穌基督得著恩典、平安!
3
願咱的主耶穌基督的上帝也是伊的父得著謳咾!伊佇基督曾賞賜咱佇天裡逐項屬佇神的福氣:
4
就是照伊創造世間的代先,佇基督揀咱,互咱佇伊的面前成做聖,無通嫌;
5
伊照伊的旨意所歡喜的,用仁愛代先定著咱對耶穌基督得著做子來歸佇伊,
6
互伊恩典的榮光得著謳咾;此個恩典就是伊佇所疼的子賞賜咱的。
7
佇伊咱對伊的血得著贖回,赦免罪過,照伊恩典的富有。
8
伊將此個恩典用逐樣的智慧及見識,賞賜咱到滿滿;
9
已經互咱知伊旨意的奧妙,照伊的好意,
10
就是伊佇本身所代先定著的,欲佇諸個日期圓滿的時,設法互萬物不論佇天裡的、佇地裡的,攏佇基督來合一。
11
佇伊咱也成做家業;就是代先受定著的,照彼個趁家己的旨意、行萬項有者的意思,
12
欲互伊的榮光對阮代先向望佇基督的人得著謳咾。
13
佇伊恁也已經聽見真理的道,救恁的福音,既然信,就佇伊有受所應允的聖神蓋印。
14
伊就是做咱承接業的準當,到上帝所得著的業贖回,互伊的榮光得著謳咾。
15
因為按呢,我既然聽見恁中間佇主耶穌的信,及顯出佇眾聖徒的仁愛,
16
就為著恁感謝無息。祈禱的時數念恁,
17
求咱的主耶穌基督的上帝,榮光的父,賞賜恁智慧啟示的神,來深識上帝,
18
恁的心目得著光明,互恁知伊召人所向望的是怎樣,伊的業佇聖徒中榮光的富有到怎樣;
19
閣知伊的權能向佇咱諸個信的人大到怎樣,
20
照伊前所曾行佇基督大權能大氣力的功用,互伊對死人中復活,佇天裡坐伊的大旁,
21
過攏總辦政事的、掌權的、才能的、治理的,及一切所號的名;呣若佇今世也佇來世,攏過遠遠。
22
閣互萬項有降服佇伊的腳下,閣將伊做管萬有的頭來賞賜教會。
23
教會是伊的身軀,伊所充滿的,伊也是用萬有充滿萬有的。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!