以弗所書 第 2 章 - 台語漢字羅馬本

1

閣恁平素對恁的過失恁的罪過來死的，伊也曾互恁復活。

2

是恁前行佇彼中間，趁此世間的風俗，及空中掌權的君王，就是現今運行佇悖逆的人彼個神。

3

其中阮前也攏佇阮肉體的私慾行做，趁肉體及心內的意思，生成是做通受氣的，親像別人一樣。

4

總是，上帝的憐憫真豐盛，為著伊疼咱的大仁愛，

5

當咱對過失已經死的時，就互咱及基督同活。恁對恩典得著救。

6

也互咱佇基督耶穌及伊同起來，同坐佇天裡，

7

閣對伊佇基督耶穌所賞賜咱的仁慈，欲佇後世代顯明伊恩典的極富有。

8

因為恁對恩典得著救，是對信；這也呣是出佇恁本身，是上帝所賞賜；

9

呣是出佇所行，免得人誇口。

10

因為恁是伊所做成的，受創造佇基督耶穌；來行好事，就是上帝代先備辦的欲互咱行伊。

11

所以恁著記得：恁前照肉體做外邦人，互許個稱做割禮的人稱恁做無受割禮；的割禮就是對人的手所行佇肉體的。

12

彼時，恁無基督，以色列的國無份，佇諸個應允的約無干涉，無所向望，佇世間呣識上帝。

13

恁平素離開遠遠的，今佇基督耶穌，對伊的血，有得著近倚。

14

因為伊是做咱的和平，互二旁做一個，拆去彼中間相隔的牆；

15

閣佇伊的肉體廢無結冤讎的因端，就是諸個誡命的律法，記載佇規例的，欲佇伊本身將二旁造成一個新的人，來成就和平。

16

閣已經佇十字架除去彼個冤讎，欲互二旁佇一體對十字架，及上帝和，

17

閣來傳和平互恁遠的人，也傳和平互近的。

18

因為對伊咱二旁佇一個神，得著親近父。

19

按呢，恁無閣做外面人寄腳的，就是及諸個聖徒像國，做上帝家內的人；

20

受起造佇諸個使徒及先知的地基頂，基督耶穌家己做厝角要緊的石，

21

在佇伊見若所起的攏相聯絡，佇主來漸漸成做聖殿。

22

恁也佇伊相及受起造，成做上帝用神所徛起的厝。