加拉太書 第 4 章 - 台語漢字羅馬本

1

今我講後嗣，雖然是全業的主，猶做囝仔的時及奴僕無各樣，

2

就是降服監督的及管家的，聽候老父所限定的期到。

3

親像按呢，咱做囝仔的時，也做奴僕，降服此世間的小學。

4

若是到彼個時已經滿，上帝差伊的子，對婦仁人來出世，出世佇律法下，

5

來贖回律法下的人，互咱受設立做子。

6

為著恁是做子，上帝差伊的子的神入咱的心，喉叫講：「阿爸！父啊！」

7

親像按呢，你呣是猶原做奴僕，就是做子；既然做子，就對上帝來做後嗣。

8

總是當時恁呣識上帝，做許個生成呣是上帝者的奴僕；

9

若是今已經識上帝，卡好著講互上帝所識，怎樣倒轉閣向許個軟茈空空的小學，就是恁所愛閣重再做的奴僕的啊？

10

恁致意守日、月、節、年。

11

我替恁真驚，驚了我所為著恁著磨的會空空。

12

兄弟啊，我求恁著親像我，因為我也親像恁。

13

恁攏未曾剋虧我。恁知我頭一擺傳福音互恁，是因為肉體的軟弱。

14

彼霎為著我的肉體恁有受試，猶久無看輕，也無厭賤，是接納我，親像上帝的天使，也親像基督耶穌一樣。

15

恁當時所歡喜的福氣佇叨落？因為我干證恁，設使會做得，恁就挖恁的目睭互我。

16

今我用真實給恁講，是成做恁的仇讎嗎？

17

及恁親熱，呣是好意，是愛隔斷恁，互恁及親熱。

18

獨獨佇好事，來常常互人及恁親熱的是好，呣若我及恁佇的時著按呢。

19

我的細子啊，我為恁閣受生產的艱苦，到基督的形狀成佇恁的心。

20

我愛此霎及恁佇，來換我的聲，因為我為著恁躊躇。

21

恁愛降服律法的，著給我講，恁豈無聽見律法嗎？

22

因為有記載講，亞伯拉罕有二個子，一個是女婢生的，一個是自由的生的。

23

若是彼個對女婢的是照肉體來生；彼個對自由的是對應允來生。

24

諸個攏有譬喻佇：因為彼二個婦仁人是做二個約。一個出佇西奈山，所生的做奴僕，就是夏甲。

25

此個夏甲是亞拉伯的西奈山，閣及現今的耶路撒冷像類，因為伊及伊諸個子做奴僕。

26

獨獨佇頂面的耶路撒冷是自由，是咱的老母。

27

因為有記載講：你無懷孕、無生子的，著歡喜；無有生產的艱苦的，著出大聲來叫；因為家己住的婦仁人，比有丈夫的，伊的子猶卡多個。

28

兄弟啊，咱親像以撒，做應允的子。

29

若是親像當時照肉體來生的窘逐照神來生的，此霎也是按呢。

30

呣拘聖經講怎樣？「著趕出女婢及伊的子！因為女婢的子決斷通及自由者的子同承接業。」

31

兄弟啊，按呢咱呣是女婢的子，是自由者的子。