創世紀 第 25 章 - 台語漢字羅馬本

1
亞伯拉罕閣娶一個某,名叫基土拉。
2
基土拉給伊生心蘭、約珊、米但、米甸、伊施巴、書亞。
3
約珊生示巴及底但。底但的子孫是亞書利族、利都是族、及利烏米族。
4
米甸的子是以法、以弗、哈諾、亞比大、以勒大。諸個攏是基土拉的子。
5
亞伯拉罕將一切所有的互以撒。
6
亞伯拉罕將財物分互伊諸個細姨的子,趁伊本身猶活的時差離開伊的子以撒,去東勢到東旁的地。
7
亞伯拉罕一生的年日是一百七十五歲。
8
亞伯拉罕食長歲壽成做老人,年歲滿足,斷氣死,倒祖。
9
伊的子以撒、以實瑪利將伊埋葬佇麥比拉的穴。此個穴佇幔利的頭前,赫人瑣轄的子以弗崙的田中,
10
就是亞伯拉罕對赫人所買彼區田。亞伯拉罕及伊的某撒拉攏埋葬佇遐,
11
亞伯拉罕死了後,上帝賜福互伊的子以撒。以撒倚近庇耳拉海萊徛起。
12
亞伯拉罕的子以實瑪利的世系記佇下底。以實瑪利就是撒拉的女婢埃及人夏甲對亞伯拉罕所生的。
13
以實瑪利諸個子的名,照伊的名字世系親像下底。以實瑪利的大子尼拜約,閣有基達、亞德別、米比衫、
14
米施瑪、度瑪、瑪撒、
15
哈大、提瑪、伊突、拿非施、基底瑪。
16
諸個就是以實瑪利的子的名,照的鄉村、營寨,做十二族的族長。
17
以實瑪利一生的歲壽一百三十七,氣斷死,就倒祖。
18
伊的子孫住佇哈腓拉到埃及頭前的書珥,欲去亞述的路,徛起佇伊眾兄弟的頭前。
19
亞伯拉罕的子以撒的世系記佇下底。亞伯拉罕生以撒。
20
以撒娶利百加做某的時抵仔四十歲。伊是巴旦亞蘭地的亞蘭人彼土利的查某子,亞蘭人拉班的小妹。
21
以撒因為伊的某無生子,替伊祈求耶和華;耶和華允准伊所求,伊的某利百加就懷孕。
22
囝仔佇伊的腹內相夾,伊就講:「若是此款,我乜使按呢?」就去問耶和華。
23
耶和華給伊講:二國佇你腹內;二族欲對你的身軀出。此族欲卡強彼族;序大的欲服事序細的。
24
生產的日期到,果然腹內是雙生者。
25
頭一個出來者,身體紅紅,通身軀親像皮仔衫,就給伊號名做以掃。
26
隨後伊的小弟閣出來,伊的手擒以掃的腳後,就給伊號名叫雅各。二個子出世的時,以撒抵仔六十歲。
27
二個囝仔漸漸大,以掃拍獵,常常佇山野;雅各做人恬靜,常常住布棚內。
28
以撒疼以掃,因為常常食伊的野味;
29
利百加疼雅各。有一日,雅各煮湯,以掃對山野倒來,厭倦到極。
30
以掃對雅各講:「我真厭倦,求你用此個紅的湯互我食。」因為按呢以掃亦名叫以東。
31
雅各講:「你今仔日用大子的名份賣互我。」
32
以掃講:「我都欲死啦,此個大子的名份對佇我有啥利益?」
33
雅各講:「今仔日你著對我咒誓。」伊就對伊咒誓,將大子的名份賣互雅各。
34
雅各就將餅及紅豆湯互以掃,伊就飲食,起來做伊去。這就是以掃看輕大子的名份。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!