創世記 第 3 章 - 台語漢字羅馬本

1
耶和華上帝所造山野一切的活物,蛇是比卡狡譎。蛇對婦仁人講:「上帝豈有影講園內一切的樹恁攏呣通食嗎?」
2
婦仁人對蛇講:「園內樹裡的果子阮通食,
3
只有園中央彼欉樹的果子,上帝曾講:『恁呣通食伊,亦呣通摸,驚了會死。』」
4
蛇對婦仁人講:「恁無的確會死;
5
因為上帝知,恁食的日恁的目睭就會開,恁欲親像上帝會分別好歹。」
6
婦仁人看彼欉樹好食,亦合目,閣彼欉樹是通欣慕互人有智慧,就挽伊的果子食伊,續互伊的丈夫,伊亦食伊。
7
二人的目睭就開,才知是褪腹裼,就揙無花果葉為家己做裙。
8
日涼冷的時,耶和華上帝行遊佇園內。聽見伊的聲,彼人及伊的婦仁人就匿佇園內的樹中,來閃避耶和華上帝的面。
9
耶和華上帝叫彼人,對伊講:「你佇叨落?」
10
伊就講:「我聽見你的聲佇園內,我就驚;因為我褪腹裼,就家己匿。」
11
講:「是誰給你講你褪腹裼?我吩咐你呣通食彼欉樹,你食伊嗎?」
12
彼人講:「你所互我做伴的婦仁人,伊用彼欉樹的果子互我,我就食伊。」
13
耶和華上帝對婦仁人講:「你所做是甚麼事?」婦仁人講:「蛇引誘我,我就食。」
14
耶和華上帝對蛇講:你已經做此個,所以你受咒詛,比一切的精牲及山野一切的走獸卡重;你欲用腹肚行,一生食土粉。
15
我欲互你及婦仁人結冤讎;你的後裔及伊的後裔亦結冤讎。伊欲傷你的頭殼;你欲傷伊的腳後。
16
閣對婦仁人講:我的確大大加添你懷孕的艱苦;你欲艱苦生子。你欲戀慕你的丈夫;伊欲管轄你。
17
也對亞當講:你已經聽趁你的婦仁人的話,來食我所吩咐你講你呣通食伊的,所以土地因為你的緣故受咒詛;你一世人勞苦才對伊得著食。
18
土地欲為著你發莿帕及蒺藜;你也欲食園裡的菜蔬。
19
你欲汗流滿面才通得著食,到你歸土,因為你是對土提出來。你本是土粉,也欲歸佇土粉。
20
彼人給伊的某號名叫夏娃,因為伊做眾人的老母。
21
耶和華上帝為著彼人及伊的某,用皮做衣服互穿。
22
耶和華上帝講:「看啊,此人已經及咱相親像,會分別好歹;今驚了伊伸手閣對活命樹挽來食,就活到永遠。」
23
所以耶和華上帝教伊出伊甸園,來種作彼個土,就是伊所對伊出的。
24
所以趕彼個人出;也佇伊甸園的東勢安置兵及四面轉踅發火焰的劍,來防守活命樹的路。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!