哈巴谷書 第 2 章 - 台語漢字羅馬本

1

我欲徛守更樓，徛佇營寨觀看，看伊對我講甚麼話，我通用甚麼話來訴明。

2

耶和華應我講：寫此個默示明明刻佇板裡，互讀的人也通走。

3

因為此個默示猶有定著的期，欲緊緊結局，決斷無白賊。雖然延延，猶久著聽候；因為的確會到，無閣延延。

4

看啊，伊的心神自高，佇伊的內面無正直；獨獨義人欲對伊的信來活。

5

就是欺騙者，驕傲的人，無踮佇家內，開闊伊的心所愛者，親像陰府。亦親像死會滿足，統一萬國歸伊，聚集萬百姓歸伊。

6

諸個眾人豈無欲用俗語來批評伊用譬喻來譏刺伊講：積聚多多無屬家己的財物，欲偌久？提多多準當的物家己擔負，彼號人有災禍啊！

7

咬你者豈無忽然起來，攪擾你者豈無醒起來，你就欲做所搶的物？

8

因為你搶劫多多國，列國中所剩的人也欲搶劫你，是因為你人流血，對境內及城市及其中徛起的人所行強暴的緣故。

9

為家己的家積聚不義的錢、欲作巢佇高的所在、向望脫離兇惡的勢力，彼號人有災禍啊！

10

你滅多多百姓，所計謀的，凌辱家己的家，閣犯罪害家己的生命。

11

壁中的石欲喉叫；柴料中的棟樑欲應聲。

12

用人流血來起城、用罪孽設立城市者有災禍啊！

13

看啊，眾百姓所勞碌的互火燒去，列國著磨到厭倦者歸佇空空，豈呣是攏出佇萬軍的耶和華嗎？

14

因為耶和華的榮光欲互全地攏識，親像水充滿洋海一樣。

15

互伊的厝邊飲、閣參猛烈的酒、互伊飲到醉，通看見伊的下體，彼號人有災禍啊！

16

你所充滿的是凌辱，呣是榮光；你亦著飲，顯出是未受割禮者！耶和華正手的杯欲越轉來互你飲；你的凌辱欲蓋密你的榮光。

17

閣你對黎巴嫩所行的強暴以及殘害野獸互伊驚惶的事攏欲遮蓋你；是因為你人，對境內城市及其中徛起的人所行強暴的緣故。

18

雕刻的像，有甚麼利益，才互造伊的人雕刻伊啊？鑄的偶像及假的先生有甚麼利益，才互造伊的人倚靠伊來造啞口的偶像啊？

19

對柴頭講：著醒！對啞口的石頭講：起來！彼號人有災禍啊！此個豈會教示人嗎？看啊，是用金用銀包的，伊的內面攏無活氣。

20

獨獨耶和華佇伊的聖殿；全地佇伊的面前攏著靜靜。