希伯來書 第 11 章 - 台語漢字羅馬本

1
信就是所向望者的實在,及未看見的事的憑準。
2
因為佇此個,就古早人有得著干證。
3
對信,咱知諸個世界是對上帝的話來造成;按呢,所看見的,呣是對會看見的來成。
4
對信,亞伯獻祭互上帝,比該隱卡好,對按呢得著干證伊是義,就是上帝看伊的禮物來做干證。閣對此個信,伊死了猶講話。
5
對信,以諾受遷徙,致到無見著死,人尋伊著,因為上帝遷徙伊;是未遷徙的代先,有得著干證伊互上帝歡喜。
6
設使無信,就會互上帝歡喜;因為親近上帝者,的確著信伊有,也是報賞許個求伊的人。
7
對信,挪亞佇未看見的事,已經得著默示,就敬畏,來備辦大船,救伊的家眷。對按呢來定世間的罪,閣得著承接照信的義。
8
對信,亞伯拉罕受召的時就順命令出去,到將來欲得著做業的地;伊出去,呣知欲去叨落。
9
對信,就出外佇所應允的地,親像佇呣是家己的地,徛起佇布棚,及以撒、雅各就是相及承接同一樣的應允的。
10
因為伊向望有地基的城,是上帝所經營起造的。
11
對信,撒拉,雖罔過生產的年歲,猶得著會懷孕,因為伊掠應允伊的做信實。
12
所以對一人閣是親像已經死者生湠,親像天星的多,親像海沙的算得。
13
諸個攏是照信來死,未曾得著所應允的;獨獨遠遠看,歡喜來等接,閣家己認佇地上做人客,做出外的。
14
因為按呢講的是表明in teh尋一個祖家。
15
in若數念所對遐出來的地,就有通倒去的機會。
16
總是今in欣慕閣卡好的,就是佇天裡的。所以上帝稱做in的上帝,無掠做見誚,因為已經替in備辦一個城。
17
對信,亞伯拉罕受試的時,獻以撒;就是彼個承受諸個應允的,獻伊獨生的子。
18
曾有給伊講:「對以撒生的欲稱做你的後裔。」
19
因為伊掠做上帝對死人中會互伊復活;所以通譬喻講得著伊對死倒轉來。
20
對信,以撒論將來的事祝福雅各、以掃。
21
對信,雅各臨終的時,給約瑟二個子祝福,倚枴仔來敬拜。
22
對信,約瑟臨終的時,念著以色列的後裔欲出埃及,閣為著伊的骨骸來吩咐。
23
對信,就摩西出世的時,伊的父母因為看見子清秀,囥密伊三月日,亦呣驚王的命令。
24
對信,摩西已經長成呣承認做法老查某子的子。
25
卡愛及上帝的百姓相及受苦難,呣愛暫時享受罪惡的快樂。
26
掠做有份基督的凌辱比埃及的財寶卡貴氣,是向望報賞的緣故。
27
對信,伊離開埃及,無驚王的受氣;堅心忍耐,親像看見所看見的主。
28
對信,來設過節,及抹血的禮,免得剿滅大子的磕著。
29
對信,過紅海親像行乾地;埃及人試行伊,就沈落去。
30
對信,踅耶利哥城歷過七日,城就倒壞。
31
對信,娼妓喇合用和平接納細作,所以無及呣順趁的人相及滅無。
32
我欲閣講甚麼啊?欲講基甸、巴拉、參孫、耶弗他、及大衛、撒母耳,以及諸個先知,就時無夠額。
33
許個人對信,贏諸個國,行公義,得著應允,勒獅的嘴,
34
拍熄火焰,閃避利刀;弱成做強,交戰勇猛,攻破外邦的戰陣。
35
有婦仁人得著的親人對死復活。亦有人受酷毒的刑罰,呣願受贖,是愛得著卡好的復活。
36
閣有人受戲弄、鞭拍、以及鎖鍊、關監、諸個試,
37
閣有人受石頭擲,鋸仔鋸,受誘惑的試,互刀死,穿綿羊山羊的皮奔波逐所在,抵著喪鄉、患難、暴虐,
38
有的佇曠野、佇山嶺、佇石洞、佇地穴,四界漂流,諸個人是世間堪得有的。
39
攏已經對信得著干證,若是未曾得著所應允的;
40
因為上帝給咱代先備辦閣卡好的事,是欲互若無咱,就得著完全。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!