以賽亞書 第 15 章 - 台語漢字羅馬本

1
論摩押的默示:因為一暝的中間,摩押的亞珥變做荒廢,無去;因為一暝的中間,摩押的基珥變做荒廢,無去。
2
伊上到巴益,閣去底本,到高的所在啼哭。摩押人因為尼波及米底巴哀哭,逐個頭殼光溜溜,嘴鬚剃了了。
3
佇街市裡腰攏縖麻布,佇厝頂及彼個寬闊的所在逐人攏啼哭,目屎直直流。
4
希實本及以利亞利悲哀的聲聽到雅雜,所以摩押帶軍器的大聲喝喊,伊的心愕愕惙。
5
我的心為著摩押悲哀;伊的貴族走到瑣珥,到伊基拉.施利施亞。上魯希的路,愈行愈哮;佇何羅念的路,因為毀滅出哀哭的聲。
6
因為寧林的水欲乾去,因為青翠的草枯焦,黑幼的菜蔬滅無,青翠的物,攏無去。
7
因為按呢,摩押人所得著的財物及所積聚的攏欲帶過柳樹溪。
8
因為哀慘的聲遍滿摩押的四境;哀哭的聲聽到以基蓮;哀哭的聲聽到比珥以琳。
9
因為底們的水有血滿滿;我欲加添底們的災難,互獅來追摩押逃脫的百姓,及彼所在所剩的人。

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!