以賽亞書 第 21 章 - 台語漢字羅馬本

1

論海邊曠野的默示：有對曠野對通驚的地來者，親像南方的狂風掃過去。

2

互人驚的異象已經默示我。詭詐的行詭詐，毀滅的行毀滅。以攔啊，你著上去！米太啊，你著圍困伊！一切的吐氣我互伊息。

3

所以，我滿腰痛疼；痛苦將我擒住，親像婦仁人生子的痛苦。我攪絞疼到會聽；我驚惶到看。

4

我的心迷亂，驚惶拍驚我。我所宴樂的下昏，變做我的愕愕惙。

5

排設筵席，派人守望，亦食亦飲。首領啊，恁著起來，用油抹盾牌。

6

主對我講：你去設法守望者，互伊將所看見的來報告。

7

伊看見軍隊，騎馬者一對一對，閣有驢隊，駱駝隊攏來，就欲俯耳孔詳細聽。

8

伊親像獅哮叫，講：主啊，我日時定定徛佇望高樓，歸暝徛佇我守更的所在。

9

看啊，有一隊的馬兵，一對一對來。伊閣應講：巴比倫倒壞啦！倒壞啦！伊一切神明的像攏拍碎佇地裡。

10

我受碖的稻把，我粟場的五穀啊，我對萬軍的耶和華──以色列的上帝所聽見的，攏給恁講啦。

11

論度瑪的默示：有對西珥叫我講：守望者啊，暝間甚麼時？守望者啊，暝間甚麼時？

12

守望者應講：早起時欲到，黑暗暝亦來。你若欲問就通問，通回頭閣來。

13

論亞拉伯的默示：底但歸陣的出外人啊，恁欲歇暝佇亞拉伯的樹林內。

14

提瑪徛起的百姓捧水出來，送互嘴乾者，提餅來迎接逃走的。

15

因為閃避利劍拔出的刀，拼緊的弓及交戰的猛烈。

16

主對我按呢講：「一年的內面，照倩工的年限，基達一切的榮光欲攏無去。

17

許個抬弓箭的，基達的勇士所剩的數額少少，因為這是耶和華──以色列的上帝講的。」