以賽亞書 第 32 章 - 台語漢字羅馬本

1
看啊,欲有一個王照公義來做王;欲有首領照公平來掌權。
2
欲有人做親像閃避風的所在做匿大雨的位,親像溪流的水佇乾地,親像大石的蔭影佇厭倦的所在。
3
彼個會看見的人,目睭無閣煙暈;會聽的人,耳孔欲俯聽。
4
躁性人的心欲明白智識;舌根的人的舌欲講話緊閣明。
5
戇人無閣稱做高明;堅吝的人無閣稱做大量。
6
因為戇人欲講戇話,心想做歹,慣勢行褻瀆的事,講差謬的話攻擊耶和華,互枵的人無物通食,嘴乾的人無水通飲。
7
堅吝的人所用的法度是歹的;伊設計謀,用白賊話毀滅艱苦人;喪鄉的人講論公理的時,伊亦猶原行毀滅。
8
總是高明的人計劃高明的事,亦長長踮佇高明。
9
清閒的婦仁人啊,著起來聽我的聲!無掛慮的查某子啊,著俯耳孔聽我的話!
10
無掛慮的查某子啊,閣過一年卡加,欲驚惶;因為無葡萄通挽,無果子通收成。
11
清閒的婦仁人啊,著愕愕惙;無掛慮的查某子啊,著驚惶,褪衫赤體,腰縖麻布。
12
欲為著好的田地及茂盛的葡萄樹,搥胸。
13
莿帕蒺藜欲發生佇我的百姓的地,亦欲發生佇歡喜的城快樂的厝。
14
因為王宮欲荒廢,鬧熱的城欲冷靜;山頭及守更樓永遠做山洞,做野驢歡喜的所在,做歸陣精牲的草場。
15
聽候聖的神對頂面傾落佇咱,曠野變做肥的田,肥的田看做親像樹林。
16
彼時,公平欲住佇曠野;公義欲踮佇肥的田。
17
義的功效是平安;義的效驗是平靜安穩,到佇永遠。
18
我的百姓欲踮佇平安的宅,安穩的厝,清靜歇睏的所在。(
19
獨獨樹林倒落去的時欲落雹;閣彼個城欲降落到真低。)
20
恁諸個撒種佇逐個水邊者,放牛驢佇遐的有福氣!

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!