以賽亞書 第 50 章 - 台語漢字羅馬本

1
耶和華按呢講:我離出恁的老母,離書佇叨落啊?我將恁賣互我叨落一個債主啊?看啊,恁受賣是因為恁的罪過;恁的老母受離出,是因為恁的過失。
2
我來的時,無人佇是怎樣?我叫的時,無人應是怎樣?我的手豈是短、會救贖嗎?我豈無拯救的力嗎?看啊,我一下喝,海就乾去;我互江河變做沙漠;其中的魚因為無水臭爛,嘴乾就死。
3
我互諸個天用黑暗做衣服,用麻布做遮蓋。
4
主耶和華賞賜我受教示者的舌,互我知怎樣用言語扶助厭倦的人。主逐早起叫醒,叫醒我的耳孔,互我會聽,親像受教示的人一樣。
5
主耶和華開通我的耳孔;我並無違逆,亦無退後。
6
人拍我的尻脊骿,我出在伊拍;人掇我嘴的嘴鬚,我出在伊掇;人凌辱我,給我呸涎,我亦無掩面。
7
因為主耶和華的確幫助我,所以我無見誚。為著按呢,我互我的面硬親像石;我亦知我的確無致到漏氣。
8
稱我做義者近啦;是誰及我相爭,伊通及我相及徛;是誰做我的對敵,伊通就近我。
9
看啊,主耶和華欲幫助我;是誰會定我有罪啊?看啊,攏親像衫漸漸舊,互蛀蟲所食。
10
恁中間是誰敬畏耶和華、聽趁伊的奴僕的話啊?行佇黑暗,無有光明者。著倚靠耶和華的名,倚靠伊的上帝。
11
看啊,凡若恁點火,用火把圍家己者,通來行佇恁的火焰內,及恁所點的火把中。這是我的手所定著的;恁欲倒佇艱苦的中間。

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!