以賽亞書 第 51 章 - 台語漢字羅馬本

1
恁諸個追公義、尋耶和華者,著聽我!恁著想看恁對遐拍出來的石磐,對遐掘出來的土孔。
2
著想看恁的祖公亞伯拉罕及生恁的撒拉;因為伊孤單一人的時,我揀召伊,賜福伊,互伊加添多多。
3
因為耶和華已經安慰錫安亦安慰伊一切拋荒的所在,互伊的曠野親像伊甸,互沙漠親像耶和華的園;佇中間欲有歡喜、快樂、感謝,及唱歌的聲。
4
我的百姓啊,著注意聽我;我的國民啊,著俯耳孔聽我;因為法律欲對我出;我欲立我的公理來做列邦的光。
5
我的公義近啦;我的救恩發出。我的手欲判斷列邦;海嶼攏欲聽候我,閣欲倚靠我的手。
6
恁著抬目向天,俯頭看地;因為諸個天欲親像煙雲消散,地欲親像衫漸漸舊;伊的徛起的百姓亦欲親像按呢死無。只有我的救恩永遠佇,我的公義亦無廢無。
7
知識公義,存我的教示佇心內的百姓,著聽我的話,莫得驚人的譏刺,亦莫得因為人的誹謗來驚惶。
8
因為蛀蟲欲食,親像食衣裳;剪蟲欲食,親像食羊毛。只有我的公義永遠佇,我的救恩直到萬代。
9
耶和華的手啊,起來!起來!施出大氣力,起來!親像早時的年日、古早的世代一樣。從前拍碎拉哈伯,鑿透龍者,豈呣是你嗎?
10
互海及深淵的水乾去、互海深的所在變做路,互受贖的百姓經過者,豈呣是你嗎?
11
耶和華救贖的百姓欲倒轉來,欲唱歌來到錫安;得著永遠的歡喜做冕旒。欲歡喜快樂;憂悶吐氣攏欲走去。
12
我,我是安慰恁的。你是甚麼人,竟然驚彼個欲死的人?驚彼個欲變做親像草的世間人?
13
亦記得展開諸個天、安定地的地基、創造你的耶和華?通日因為暴虐者的大受氣,來驚惶,照伊圖謀欲毀滅的情形其,實彼個暴虐者的大受氣佇叨落啊?
14
受壓迫的欲緊緊得著解放,的確無死來落穴;伊的米糧亦無絕。
15
我是耶和華──你的上帝──搖動大海,互伊的湧嘩嘩哮──萬軍的耶和華是伊的名。
16
我將我的話下佇你的嘴,用我的手的影遮蓋你,為著欲開天闢地,閣對錫安講:你是我的百姓。
17
耶路撒冷啊,起來!起來! !你對耶和華的手中飲伊大受氣的杯,飲彼個互人顛顛倒倒的杯盞,飲到乾乾。
18
伊所生諸個子的中間,無一個引導伊;伊所養飼大漢諸個子的中間,無一個牽伊的手。
19
此二項臨到你,是誰會替你哀傷啊?就是有衰敗、及滅無、飢荒、及劍,我欲怎樣安慰你?
20
你諸個子昏去,倒佇逐個街路口,親像鹿佇羅網的中間,受耶和華滿滿的受氣──你的上帝的責備。
21
所以,你此個困苦閣醉的,卻呣是因為酒來醉,你著聽。
22
你的主耶和華──就是為著伊的百姓伸冤的上帝,按呢講:看啊,我已經將彼個互人顛顛倒倒的杯,就是我大受氣的杯盞,對你的手提出來;你的確呣免閣飲。
23
我欲將此個杯下佇歹款待你的人的手中;曾對你講:你著俯落去,出在阮踏過去!你就用尻脊骿做親像地,親像街路,出在人經過。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!