雅各書 第 5 章 - 台語漢字羅馬本

1
今,恁富人,著為著欲到佇恁的苦難,來啼哭、喉叫。
2
恁的錢財已經敗壞,恁的衣裳著蛀蟲。
3
恁的金銀生銹;彼個銹欲做干證來攻擊恁,也欲食恁的肉,親像火燒。恁佇諸個路尾日已經積聚財寶。
4
你看,收割恁的園者的工錢,恁所呣互來剋虧人的,有聲喉叫,閣收割的人諸個哀怨的聲透入萬軍的主的耳孔。
5
恁佇地上曾宴樂、奢侈,養恁的心佇殺戮的日。
6
彼個義人恁曾定伊的罪,來死伊,伊也無抵敵恁。
7
兄弟啊,所以恁著常常吞,到佇主的降落。你看,作穡人聽候地上寶貝的土產,常常吞聽候伊到得著秋霖春雨。
8
恁也著常常吞,堅固恁的心,因為主的降臨近啦。
9
兄弟啊,莫得相怨妒,免得恁受審判。你看,審判司已經徛佇門口。
10
兄弟啊,許個託主的名來講的先知,恁著取做受患難吞的模樣。
11
許個曾吞的人,咱講有福氣。恁曾聽見約伯的吞,閣看主到尾怎樣,就是主滿腹的慈悲及憐憫。
12
獨獨我的兄弟啊,第一要緊,莫得咒誓;莫得指天,抑是地,抑是別項物來咒誓。恁的,是,著做是;呣是,做呣是,免得恁抵著擬罪。
13
恁中間有人受苦嗎?伊著祈禱;有人歡喜無?伊著吟詩。
14
有人破病無?伊著叫教會的長老;佇主的名用油抹伊,近倚伊來祈禱。
15
有信的祈禱欲救破病的人,主欲互伊起來;伊若有罪,欲赦免伊。
16
恁著相對認罪,相替祈禱,通得著醫好。義人的祈禱,伊的力量有大功效。
17
以利亞是及咱同情的人,伊切切求莫得落雨,就無落雨佇地裡歷過三年閣六月日。
18
伊閣祈禱,天就落雨,地就出土產。
19
我的兄弟啊,恁中間若有失迷真理的,有人互伊越轉,
20
通知互一個罪人對迷路倒轉的,會救伊的靈魂出死,閣會遮蓋多多罪過。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!