約翰福音 第 2 章 - 台語漢字羅馬本

1
第三日,佇加利利的迦拿有婚姻的筵席,耶穌的老母佇遐。
2
耶穌及伊的學生也互請去赴筵席。
3
酒用了,耶穌的老母就對伊講:「無酒啦。」
4
耶穌給伊講:「老母啊,我及你甚麼干涉?我的時猶未到。」
5
伊的老母給諸個差用的人講:「凡若伊給恁講的,恁著行伊。」
6
照猶太人洗清氣的例,佇遐有排六個石甕,逐個會貯得二三桶水。
7
耶穌給差用的人講:「用水互伊滿甕。」就互伊滿到甕口。
8
閣給講:「今著舀伊,捧互掌理筵桌的人。」就捧互伊。
9
水變做酒,掌理筵桌的試飲伊,呣知對叨落來,獨獨舀水的差用知。掌理筵桌的就叫新子婿來,
10
給伊講:「人攏是代先排好酒,到人飲多多,才用卡次的,獨獨你留好酒到此霎!」
11
此個頭一擺的神蹟,耶穌行佇加利利的迦拿,來顯出伊的榮光;伊的學生就信伊。
12
此個事以後,伊及伊的老母、及兄弟,以及伊的學生落去迦百農,遐無幾日。
13
猶太人的過節近啦,耶穌上耶路撒冷。
14
佇殿裡抵著有賣牛、羊、鴿仔,亦有換錢的坐,
15
耶穌用索做鞭,趕及羊牛攏出殿,閣捙倒換錢的人的錢,反輪轉的桌,
16
閣給賣鴿仔的講:「帶諸個物去!呣通用我的父的厝做買賣的厝。」
17
伊的學生記得聖經有記講:「我為著你的厝,心內親像火。」
18
猶太人就應伊講:「你做諸個代誌,用甚麼神蹟互阮看?」
19
耶穌應講:「恁毀壞此個殿,我三日欲閣起伊。」
20
猶太人就講:「此個殿歷過四十六年才起好,亦你三日欲閣起伊嗎?」
21
若是伊按呢講是論伊的身軀的殿。
22
到伊對死人中復活,伊的學生才記得伊曾按呢講,就信聖經及耶穌所講的話。
23
當過節耶穌佇耶路撒冷,佇節期中多多人看見伊所行的神蹟,就信伊的名。
24
若是耶穌無用本身交託;因為伊知眾人,
25
也無欠用人對伊證明人是怎樣,因為伊家己知人心內所囥的。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!