約珥書 第 1 章 - 台語漢字羅馬本

1
耶和華的話臨到毗土珥的子約珥者。
2
老大人啊,恁著聽此個;此所在徛起的百姓啊,恁著俯耳孔。當恁的日,抑是恁的列祖的日,曾有此個事嗎?
3
恁著將此個事傳互恁的子,子傳互孫,孫傳互後代。
4
草蜢食剩的,第二種的草蜢來食伊;第二種食剩的,第三種的草蜢來食伊;第三種食剩的,第四種的草蜢來食伊。
5
酒醉的人啊,恁著醒來啼哭;好酒的人啊,著為著甜酒來啼哭,因為無酒通閣到你的嘴啦。
6
因為有一族上來我的地,強猛閣算得;伊的齒親像獅的齒,伊的牙親像母的獅的牙。
7
伊毀壞我的葡萄樹,剝我的無花果樹,互伊光溜溜,來棄拺伊,伊的枝變做白。
8
你著啼哭,親像在室女腰縖麻布,為著少年的時的丈夫啼哭。
9
素祭及奠酒攏無通到耶和華的殿;服事耶和華的祭司攏悲哀。
10
田拋荒,地悲哀;因為五穀毀壞,新酒乾去,油也欠缺。
11
作田人啊,恁著見誚;修理葡萄園者啊,恁著哀叫;為著小麥及大麥的緣故,因為田園的收成攏無去。
12
葡萄樹乾去;無花果樹枯焦。石榴、棗樹、蘋果,連田野一切的樹木也攏枯焦;人間的快樂攏消無。
13
祭司啊,恁著縖麻布啼哭;佇祭壇服事的啊,恁著哀叫;做我的上帝差用的人啊,恁著來穿麻布過暝,因為素祭及奠酒攏無通獻佇恁的上帝的殿。
14
恁著設一個禁食的聖日,召集嚴肅會,招集老大及國內一切徛起的百姓,到耶和華──恁上帝的殿,哀求耶和華。
15
慘啊!彼日,因為耶和華的日近啦。親像毀滅欲對全能者來。
16
食物豈呣是對咱的目前斷絕嗎?歡喜快樂豈呣是對咱的上帝的殿停止嗎?
17
種子爛佇土內;粟倉荒廢,粟倒壞;因為五穀乾拉去。
18
精牲哀哮到怎樣;牛群紛亂,因為無草;羊群也困苦。
19
耶和華啊,我求叫你,因為火燒滅曠野的草場;火焰燒盡田野的樹木。
20
田野的走獸向你喘;因為溪水乾去,火也燒滅曠野的草場。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!