約拿書 第 4 章 - 台語漢字羅馬本

1

總是此個事約拿真無歡喜，大大受氣，

2

就祈禱耶和華講：「耶和華啊，今求你，我佇本國的時豈呣是按呢講？所以我趕緊走去他施，因為我知你是有恩典的上帝，充滿憐憫，無快受氣，有豐盛的慈愛，閣退悔所講欲降落的災禍。

3

耶和華啊，今求你取我的生命！因為我死比活卡好。」

4

耶和華講：「你按呢受氣合理嗎？」

5

對按呢約拿出城，坐佇城的東勢，佇遐為家己搭寮仔，坐佇蔭影下，愛欲看彼個城到底怎樣。

6

耶和華上帝備辦一欉蓖麻，互伊發生卡高約拿，做蔭影遮伊的頭殼，互伊免艱苦；約拿因為此欉蓖麻大大歡喜。

7

總是隔日天昲光，上帝備辦一尾蟲。食此欉蓖麻，致到枯焦。

8

日出的時，上帝備辦炎熱的東風，閣日曝約拿的頭殼，互伊昏去，伊就為家己求死，講：「我死比活卡好！」

9

上帝對約拿講：「你因為此欉蓖麻受氣合理嗎？」應講：「我受氣到死，亦合理！」

10

耶和華講：「此欉蓖麻你無為伊著磨，你無互伊大欉；一暝發生，一暝死去，你猶久疼惜；

11

何況我，我豈呣著疼惜尼尼微此個大城嗎？其中會分別左右手者呣若十二萬，閣有多多精牲？」