士師記 第 18 章 - 台語漢字羅馬本

1

彼時，以色列中無王。彼時但的人的支派尋地做業通徛起；因為到彼日，佇以色列支派中猶未得著業。

2

但的人對瑣拉及以實陶差本族眾百姓中五個勇士，去偷看彼個地來查考，吩咐講：「恁去查考彼個地。」來到以法蓮山，入米迦的厝，就歇佇遐。

3

近米迦的厝，認著彼個少年利未人的聲音，就入去問伊：「是誰導你來遮？你佇遮做甚麼？你佇遮得著甚麼？」

4

伊講：「米迦款待我按呢按呢，伊有倩我，我做伊的祭司。」

5

給伊講：「請你問上帝，互阮知阮所行的路，亨通抑無？」

6

祭司給講：「恁通平安去，恁所行的路是佇耶和華的面前。」

7

五人就起身，來到拉億，看見遐的百姓安然徛起平安無掛慮，親像西頓人一樣。佇遐無有掌權用甚麼事來攪擾；離開西頓人遠遠，無及別人往來。

8

五人倒來到瑣拉、以實陶，兄弟遐；兄弟問講：「恁有甚麼話？」

9

應講：「起來，咱上來去攻擊！因為阮已經看彼個地，看啊，彼個地真好。恁啥事恬恬？著來去入，得著彼個地做業，呣通延延。

10

恁到遐，欲看安然徛起的百姓，所在也開闊。上帝已經將彼所在交佇恁的手；地上所有的物，彼所在無欠一項。」

11

對按呢但族的六百人，逐個帶軍器，對瑣拉及以實陶進前去，

12

上去紮營佇猶大的基列耶琳。所以叫此所在名瑪哈呢但，到今仔日。看啊，這是佇基列耶琳的後面。

13

對遐去以法蓮山地，到米迦的厝。

14

從前偷看拉億地的五人給的兄弟講：「諸個厝內有以弗得及家內偶像，及雕刻的像鑄的像，恁知嗎？今恁著想看欲怎樣做。」

15

就越去遐，到彼個少年的利未人的厝，就是米迦的厝問伊平安。

16

但族許個六百人帶軍器，攏徛佇門口。

17

偷看地的五人就入去，將雕刻的像、以弗得、家內的像、及鑄的像，攏提去。祭司及帶軍器的六百人，相及徛佇門口。

18

彼五人入米迦的厝，提雕刻的偶像、以弗得、家內的偶像，及鑄的像，祭司就問講：「恁做甚麼啊？」

19

應講：「莫得做聲，用手掩嘴，隨阮來去！做阮的父、做阮的祭司。你做一人的家的祭司卡好？抑是做以色列一支派一族的祭司卡好啊？」

20

祭司心歡喜，就提以弗得及家內的偶像，及雕刻的像，行佇百姓的中間。

21

就越轉身離開遐，互囝仔、精牲、貨財做頭前。

22

離開米迦的厝嶄然遠，米迦許個厝邊攏聚集，追趕但的人，喉叫但的人。

23

但的人越頭看問米迦講：「你聚集許個人來是甚麼代誌啊？」

24

伊講：「我所妝的上帝及祭司恁攏帶去，我猶有剩甚麼？怎樣猶問我講『你甚麼代誌』啊？」

25

但的人給伊講：「你呣通互阮聽見你的聲，驚了躁性的人來共恁，致到你及全家攏失落生命。」

26

但的人做行。米迦看見比伊卡強，就越轉身倒去伊的厝。

27

帶米迦所做的及伊所有的祭司到拉億，看見安然無掛慮的百姓，就用刀死，閣放火燒彼個城，

28

也無人拯救；因為離開西頓真遠，閣無及別人往來。彼個城佇彼個倚近伯利合的山谷。

29

但的人閣佇遐起城來徛起，照祖公以色列的子但的名，叫彼個城名但；彼個城起頭名叫拉億。

30

但的人就為家己祀彼個雕刻的像。摩西的孫、革舜的子約拿單，及伊的子孫做但的支派的祭司，直到彼地方的人抵著掠的日。

31

上帝的厝佇示羅許個日，但的人為家己祀米迦所做雕刻的像。