利未記 第 16 章 - 台語漢字羅馬本

1
亞倫二個子近倚耶和華的面前來死。死了,耶和華吩咐摩西,對摩西講:
2
「著給你的兄亞倫講,呣通隨便時入聖所的帳簾內、到約櫃頂施恩所的面前,免得死,因為我欲佇雲中顯現佇施恩所的頂面。
3
亞倫欲入聖所著按呢,著帶一隻牛仔子做贖罪祭,一隻綿羊做燒祭。
4
伊著穿幼苧布聖的內衫,也著穿幼苧布的褲佇身軀裡,腰縖幼苧布的帶,頭戴幼苧布的帽;這攏是聖的衣服。伊著用水洗身軀,然後穿伊。
5
伊著對以色列人的會中取二隻山羊做贖罪祭,一隻綿羊做燒祭。
6
「亞倫著獻為本身做贖罪祭的牛,為著本身及伊的家贖罪;
7
也著用彼二隻山羊安置佇會幕門口、耶和華的面前,
8
亞倫著為著彼二隻山羊拈鬮,拈一隻歸耶和華,拈一隻歸阿撒瀉勒。
9
亞倫著用彼隻拈鬮歸耶和華的山羊獻做贖罪祭,
10
若是彼隻拈鬮歸阿撒瀉勒的山羊著活活安置佇耶和華的面前,替伊贖罪,放伊去曠野,歸佇阿撒瀉勒。
11
「亞倫著牽為家己做贖罪祭的牛仔,為著家己及伊的家贖罪;也著為家己做贖罪祭的牛仔;
12
也著提香爐,對耶和華的面前壇頂貯的火炭滿滿,也著用芳的香末一帶入帳簾內,
13
也佇耶和華的面前,將香下佇火裡,互香煙遮掩約櫃頂的施恩所,免得伊死;
14
也著提淡薄牛仔的血,用指頭仔灑佇施恩所的東勢,閣用指頭仔佇施恩所的面前灑血七擺。
15
「閣著彼隻為著百姓做贖罪祭的山羊,帶伊的血入帳簾內,用伊的血灑佇施恩所及施恩所的面前,親像灑牛仔的血一樣。
16
閣著因為以色列人的污穢、過失,及一切的罪惡替聖所贖罪,也著為著佇污穢的中間,相及住的會幕照按呢行。
17
亞倫入聖所贖罪的時,會幕內呣通有人佇,聽候伊為著本身及伊的家及以色列的會眾已經贖罪出來。
18
伊著出來,到耶和華面前的壇遐,替伊贖罪,也著提淡薄牛仔的血及山羊的血,抹佇壇頂許個角的四圍;
19
也著用伊的指頭仔灑血佇壇裡七擺,互伊清氣,離開以色列人的無清氣,分別伊做聖。」
20
「伊為著聖所、會幕、祭壇贖罪明白,著牽彼隻活的山羊來。
21
亞倫著用二手按佇活的山羊的頭殼,佇伊的頂面認以色列人一切的歹,一切的過失,及一切的罪過,攏歸佇山羊的頭殼,交代所派的人,送去曠野。
22
彼隻山羊欲擔當一切的歹,到無人住的所在,伊就放山羊佇曠野。
23
「亞倫著入會幕,褪伊入聖所的時所穿幼苧的衣服,留佇遐,
24
閣著佇聖的所在用水洗身軀,穿伊的衫,出來,獻伊的燒祭及百姓的燒祭,為著本身及百姓贖罪。
25
贖罪祭的油著燒伊佇壇頂。
26
彼個放山羊歸佇阿撒瀉勒的人,著洗伊的衫,用水洗身軀,然後通入營內。
27
做贖罪祭的牛及贖罪祭的山羊,的血已經帶入聖所贖罪,的身體著帶出營外,用火燒的皮、的肉、的糞。
28
燒的人著洗伊的衫,用水洗身軀,然後通入營內。」
29
「逐擺抵著七月初十日,恁著刻苦恁的心,無論是本地人,抑是寄腳佇恁中間的外人,攏呣通做甚麼工;這欲做恁永遠的例。
30
因為佇此日欲給恁贖罪,互恁清氣。恁欲佇耶和華的面前得著清氣,脫離一切的罪過。
31
此日恁著守做大的安息日,恁著刻苦恁的心;這是做永遠的例。
32
彼個受抹油、來設立伊當聖職的祭司,就是承接伊的老父做祭司的,著行贖罪的禮,著穿幼苧布的衫就是聖衫。
33
伊著為著聖的聖所贖罪,也為著會幕及祭壇贖罪,閣為著眾祭司及全會的百姓贖罪。
34
這著做恁永遠的例就是因為以色列人一切的罪,著一年一擺為著贖罪。」亞倫就照耶和華所命令摩西的來行。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!