瑪拉基書 第 1 章 - 台語漢字羅馬本

1
耶和華默示的話託仗瑪拉基傳互以色列的。
2
耶和華講:「我有疼恁。」總是恁講:「你佇甚麼事疼阮啊?」耶和華講:「以掃豈呣是雅各的兄嗎?總是我疼雅各,
3
怨恨以掃。互伊的山荒廢,用伊的業交互曠野的山狗。」
4
以東講:「阮現在雖然毀壞,猶久欲閣起荒廢的所在。」萬軍的耶和華按呢講:「欲起伊,我欲毀伊;人欲稱伊做『罪惡的境界』;做『耶和華永遠受氣的百姓』。」
5
恁欲親目看見,也欲講:「佇以色列境界的外面,耶和華欲做大!」
6
「看輕我的名的祭司啊,萬軍的耶和華對恁講:子尊敬伊的老父,奴僕尊敬伊的主人;我若做父,我得著尊敬佇叨落?我若做主人,我得著敬畏佇叨落?恁就講:『阮佇甚麼事看輕你的名啊?』
7
恁用無清氣的餅獻佇我的壇,猶閣講:『阮佇甚麼事褻瀆你啊?』因為恁講,耶和華的桌是通看輕的。
8
恁將睛暝的精牲獻做祭物,這豈呣是歹嗎?將跛腳、抑是有病的精牲來獻,這豈呣是歹嗎?恁試獻互恁的總督,伊欲歡喜恁,接納恁嗎?這是萬軍的耶和華講的。「
9
今勸恁,懇求上帝施恩寬容咱。此個事,對恁的手才有,伊豈欲接納恁中間一人嗎?這是萬軍的耶和華講的。
10
願恁中間有人關殿門,免得恁空空佇我的壇起火。萬軍的耶和華講:我無歡喜恁,亦無欲對恁的手接納禮物。
11
萬軍的耶和華講:對日出到日落的所在,我的名做大佇列邦中。逐所在,奉我的名燒香,獻清氣的禮物,因為我的名做大佇列邦中。
12
總是恁褻瀆伊,講:『耶和華的桌無清氣,伊的頂面的食物是通看輕的。』
13
恁閣講:『看啊,到許囉唆費氣!』亦掩鼻厭賤伊。這是萬軍的耶和華講的。恁用所搶者、跛腳者、破相者提來獻做禮物。我豈欲對恁的手接納嗎?這是耶和華講的。
14
假好的人佇歸群中有公的精牲,伊下願就用有瑕疵的獻互主,此號的人通咒詛。因為我是大君王,我的名佇列國中是通驚畏者。這是萬軍的耶和華講的。」

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!