瑪拉基書 第 2 章 - 台語漢字羅馬本

1

「恁諸個祭司啊，此個命令是互恁的。

2

萬軍的耶和華講：恁若呣聽，呣下佇心裡，來歸榮光我的名，我就互咒詛到佇恁，互恁的福氣變做咒詛；我已經咒詛，因為恁無將命令下佇心裡。

3

看啊，我欲為著恁來拍歹種子，閣用糞糊恁的面就是恁的牲禮的糞；恁欲及伊平平除去。

4

恁就知我用此個命令互恁，通做我及利未所立的約。這是萬軍的耶和華講的。

5

我及伊所立的是活命及平安的約。我將這互伊，互伊驚畏；伊就驚畏我，敬畏我的名。

6

真理的律法佇伊的嘴內，佇伊的嘴唇尋無不義。伊用平安正直及我同行，互多多人越轉離開歹。

7

因為祭司的嘴唇著存智識，人著對伊的嘴請教律法，因為伊是萬軍的耶和華的使者。

8

總是恁有離開彼條路，互多多人佇律法著觸。恁敗壞利未的約。這是萬軍的耶和華講的。

9

所以我互恁受眾人看輕，看做下賤；因為恁無守我的道路，佇律法用偏私款待人。」

10

咱豈呣是同一個父嗎？豈呣是一位上帝創造咱嗎？咱逐人啥事用詭詐款待兄弟，敗壞列祖的約啊？

11

猶大行詭詐，閣佇以色列及耶路撒冷的中間行可惡的事；因為猶大褻瀆耶和華所疼的聖所，娶服事外邦的上帝的查某子做某。

12

行此號事的人，願耶和華對雅各的布棚中除去伊所有的人，或是醒者，或是應者，以及獻禮物互萬軍的耶和華者。

13

恁閣按呢做，互目屎啼哭及吐氣遍滿耶和華的壇，致到伊無閣看顧禮物，也無歡喜對恁的手接納。

14

恁猶久講：「這是啥事？」因為耶和華佇你及你少年所娶的某的中間做干證。伊雖然是你的匹配，閣是你盟約的某，你猶久用詭詐款待伊。

15

伊的神雖然有剩，豈呣是造一個嗎？啥事只有一個？就是欲求聖的後裔。所以著謹守恁的心，逐人呣通用詭詐款待少年所娶的某。

16

耶和華──以色列的上帝講：「離某的事及用強暴款待某的人，我怨恨伊！所以著謹慎守恁的心，呣通行詭詐。」這是萬軍的耶和華講的。

17

恁用話刁難耶和華，恁猶久講：「阮用甚麼刁難伊啊？」因為恁講：「凡若做歹者，耶和華看伊做好，閣歡喜伊；抑是公義的上帝佇叨落啊？」