馬太福音 第 6 章 - 台語漢字羅馬本

1

「謹慎，莫得佇人的面前行恁的義，故意互看見，若按呢，就無得著報賞佇恁天裡的父。

2

所以，你賑濟的時，莫得佇你的面前歕號頭，親像假好的人佇會堂及街路所做的，愛人榮光。我實在給恁講，已經受著的報賞啦。

3

獨獨你賑濟的時，莫得互你的倒手知你的正手的所做，

4

互你的賑濟隱密。就你的父鑑察佇隱密的，欲報答你。」

5

「恁祈禱的時，莫得親像假好的人，因為愛徛佇會堂及大街面的越角祈禱，欲互人看見。我實在給恁講，已經受著的報賞啦。

6

獨獨你祈禱的時，著入你的密房，關門，求你的父佇隱密的；就你的父鑑察佇隱密的，欲報答你。

7

閣恁祈禱的時，話莫得沓沓重，親像外邦人，因為拍算講多多話才得著聽見。

8

所以恁莫得學；因為恁未求伊的代先，恁的父已經知恁所欠用的。

9

所以，恁著按呢祈禱：阮佇天裡的父；願你的名聖。

10

你的國臨到；你的旨意得成，佇地裡親像佇天裡。

11

阮的日食，今仔日互阮。

12

赦免阮的辜負，親像阮亦有赦免辜負阮的人。

13

莫得導阮入佇試；著救阮脫離彼個歹的。（有古卷加：因為國、權能、榮光，攏是你所有，代代無盡。阿們！）

14

「因為恁若赦免人的過失，恁的天父亦欲赦免恁；

15

恁若無赦免人的過失，恁的父亦無欲赦免恁的過失。」

16

「閣恁禁食的時，莫得親像假好的人帶憂容；因為將的面變歹看，欲互人看見禁食。我實在給恁講，已經受著的報賞啦。

17

獨獨你禁食的時，著抹你的頭，洗你的面，

18

無互人看見你禁食，是互你住佇隱密的父看見；就你的父鑑察佇隱密的，欲報答你。」

19

「莫得為著家己積聚財寶佇地裡；有蟲及銹拍歹，也有賊挖孔偷提的所在。

20

獨獨為著家己積聚財寶佇天裡；蟲及銹無拍歹，也無賊挖孔偷提的所在。

21

因為恁的財寶佇遐，恁的心也欲佇遐。」

22

「身軀的燈就是目睭。你的目睭若金，通身軀就光；

23

你的目睭若花，通身軀就暗。你內面的光若暗，彼個暗偌大啊！」

24

「無人會服事二個主人；因為伊會怨恨此個，疼彼個，抑是會對重此個，看輕彼個，恁會服事上帝，續服事錢財。」

25

「所以我給恁講，莫得掛慮恁的生命欲食甚麼，欲飲甚麼；抑是恁的身軀欲穿甚麼，恁的生命豈無卡大佇米糧？也恁的身軀豈無卡大佇衣裳嗎？

26

試看天中的飛鳥，無種作，無收成，無積聚佇粟倉，恁的天父也飼。恁豈無比許個卡貴氣嗎？

27

恁甚麼人會用掛慮互生命卡長一刻久？

28

啥事為著衣裳掛慮啊？試想山裡的百合花怎樣大欉；無著磨，無紡織。

29

若是我給恁講，當所羅門極行伍的時，伊所穿的，呣值著此號花的一蕊！

30

今山裡的草今仔日佇，明仔日佇火爐，上帝互伊穿到按呢，何況恁，小信的人啊！

31

所以，莫得掛慮講，阮欲食甚麼？欲飲甚麼？欲穿甚麼？

32

因為諸個攏是外邦人所求的。恁的天父也知，諸個攏是恁欠用的。

33

獨獨代先求伊的國及伊的義，就諸個物攏欲續互恁。

34

所以，莫得為著明仔日掛慮，因為彼個明仔日伊欲家己掛慮；一日的艱苦佇一日夠額。」