那鴻書 第 1 章 - 台語漢字羅馬本

1
論尼尼微的默示,伊勒歌斯人那鴻所看見的異象記佇冊裡。
2
耶和華是熱心的上帝亦行報讎。耶和華是報讎閣大受氣;耶和華對伊的對敵報讎,為著伊的仇讎來囥受氣。
3
耶和華無快受氣,有大能力,決斷無掠有罪者做無罪。耶和華的路佇捲螺風及狂風的中間,雲是伊的腳的土粉。
4
伊責備海,互伊乾,亦互諸個河攏無水。巴珊及迦密衰敗;黎巴嫩的花木也衰敗。
5
山頭因為伊振動;山嶺亦攏消溶。大地佇伊的面前起來;世界及踮佇彼中間者也是按呢。
6
伊一下痛恨,是誰會徛?伊大受氣,是誰當會起?伊的受氣親像火傾出;石磐因為伊爆裂。
7
耶和華是好,佇患難的日伊做衛所,閣識許個倚靠伊的人。
8
總是伊欲用氾濫的大水淹滅伊的地,趕對敵入黑暗。
9
恁設甚麼計謀對敵耶和華?伊欲做到盡頭;免閣第二擺的災禍。
10
縈纏親像莿帕,親像飲酒到醉醉,猶久欲燒去親像乾乾的草。
11
有一個對你遐出來,圖謀奸惡,設歹計謀,攻擊耶和華。
12
耶和華按呢講:雖然勢力充足,人額多多,亦欲受剪除,歸佇無。我雖然曾互你受苦,以後無閣互你受苦。
13
今我欲對你的頷頸遏折伊的軛,掇斷縛你的索。
14
耶和華曾出命令,論到你講:屬你的人的確無閣傳種;我欲對你的上帝的廟內除滅雕刻的偶像及鑄造的像;我欲給你備辦墳墓,因為你是卑賤。
15
看啊,有報好消息傳和平的人,伊的腳行上山頂,猶大啊,守你的節期,謝你的願!因為歹人無閣對你的中間經過,因為伊一盡滅無啦。

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!