腓利比書 第 1 章 - 台語漢字羅馬本

1
基督耶穌的奴僕保羅、提摩太批寄互徛起腓立比,佇基督耶穌攏總的聖徒,及諸個監督,以及執事。
2
願恁對咱的父上帝及主耶穌基督得著恩典、平安!
3
我見有數念恁,就感謝我的上帝;
4
逐擺為著恁眾人祈禱的時,常常歡喜來祈禱。
5
因為恁對頭一日到今,相及有份佇興起福音。
6
我也深信起頭做好的工佇恁的,欲成伊,到佇耶穌基督的日。
7
閣我為著恁眾人有此號心志是合宜;因為恁常常佇我的心內,無論我佇鐵鍊中,以及辯明來堅固福音的時,恁眾人及我有份佇恩典。
8
因為上帝給我做干證,我體基督耶穌的心,有怎樣戀慕恁眾人。
9
閣我所求的,就是互恁的仁愛佇智慧以及逐樣的曉悟,充滿又閣充滿,
10
致到恁會驗出許個卡好的事,互恁純全無塞礙,到佇基督的日;
11
用義的果子滿滿就是對耶穌基督有的,欲互上帝得著榮光謳咾。
12
兄弟啊,我愛恁知,我所抵著的代誌抵抵是互福音卡進步,
13
致到我的掛鐵鍊佇基督來顯明佇全營,及其餘的眾人。
14
閣致到佇主的兄弟大半對我的掛鐵鍊來深信,益發好膽無驚,來講上帝的道理。
15
今人傳基督,有的是出佇怨妒冤家,有的是出佇好意思。
16
諸個是出佇仁愛,因為知我是為著辯明福音來設立的;
17
許個報揚基督是出佇結黨,呣是實心,的意思是愛互我佇鐵鍊中另外加添艱苦。
18
按呢就怎樣?或是假,或是真,無論怎樣,根抵是傳基督。我因為按呢就歡喜,也欲歡喜;
19
因為我知此個事,對恁的祈禱以及耶穌基督的神的賞賜,欲致到我得著救。
20
照我所切切欣慕及向望的,就是我無一項事見誚。凡事好膽,現今也照平常按呢,或是對死,或是對活,基督欲佇我的身軀得著榮光。
21
因為論到我,活就是基督,死就是利益。
22
設使活佇肉體,這是做我的工的果子,我也呣知欲怎樣揀。
23
我佇兩難的中間,真愛倒去及基督相及佇,是不止卡好。
24
總是猶原住佇肉體,為著恁的緣故是閣卡要緊。
25
我已經深信此個,就知我欲猶原佇,也及恁眾人相及佇,致到恁的信得著進步閣歡喜,
26
互恁佇基督耶穌的誇口,為著我會愈充滿,是對我及恁閣佇。
27
獨獨恁行代誌著合佇基督的福音,互我豈採來見著恁,抑是離開恁,會聽見恁的代誌,就是恁佇一個神徛在,用一心為著福音的信相及出力。
28
凡代誌無互對敵拍驚,這是做滅無的憑據,也是做恁得救的憑據,攏是對上帝。
29
因為已經賞賜恁為著基督,呣若信靠伊,閣為著伊受苦。
30
恁出力交戰,及前所看見我的、現今所聽見我的相同。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!