箴言 第 21 章 - 台語漢字羅馬本

1
王的心佇耶和華的手中,親像水溝照伊的所愛破互伊流。
2
人的所行,家己看做正直;獨獨耶和華測 人的心。
3
行義秉公,是比獻祭閣卡得著耶和華接納。
4
目高心驕,以及歹人的燈攏是罪。
5
殷勤計劃的,得著昌盛;獨獨躁性者,會致到欠缺。
6
用詭詐的舌來得著錢的,是親像吹來吹去的浮雲,家己取死。
7
歹人的強暴欲掃除家己,因為呣肯行公平。
8
沈溺佇罪惡的,伊的路是真彎越;總是清潔的人,伊的所行是正直。
9
寧可踮佇厝頂的角頭,莫得及吵鬧的婦仁人相及住佇寬闊的厝。
10
歹人的心愛人歹;伊的目睭並無可憐伊的厝邊。
11
侮慢的人受刑罰,戇直的人就得著智慧;智慧的人受教示,就得著知識。
12
義人忖 歹人的家,知歹人會捙倒,到滅無。
13
塞密耳孔呣聽喪鄉人哀求的,伊將來求叫也無得著聽。
14
暗靜送物遏止受氣;胸前的禮物會息大受氣。
15
秉公行義對好人做歡喜,對佇歹人做敗壞。
16
離開明理的路的,彼個人踮佇陰魂的會中。
17
愛奢侈的,欲致到喪鄉;好酒及油的,會好額。
18
歹人做義人贖回的價錢;奸詐的人做正直人的替身。
19
寧可踮佇曠野,呣通及吵鬧厚的婦仁人相及住。
20
智慧的人厝內有貴氣的寶物及油;戇人就損了了。
21
追尋公義及仁慈的,就尋著活命、及公義,及榮顯。
22
智慧的人絔上勇士的城,敗壞伊所倚靠的勢力。
23
保守伊的嘴及舌的,就保守伊的神魂免受災害。
24
驕傲自高的人名叫侮慢;伊用驕傲猖狂做代誌。
25
貧憚的人欲對貪慾來死;因為伊的手呣肯做工。
26
有人通日貪慾不知足;若是義的人捨施攏無堅吝。
27
歹人的祭獻是可惡的;何況伊存歹意思來獻啊?
28
濫糝干證的人欲滅無;獨獨親耳聽來講的,無人會辯倒伊。
29
歹人面皮厚;若是正直的人謹慎伊的所行。
30
無彼號智慧、聰明、計劃通抵敵耶和華。
31
馬是為著交戰的日來備辦的;總是得勝是對耶和華。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!