箴言 第 23 章 - 台語漢字羅馬本

1
你若及官長坐桌,著注意彼個佇你面前的。
2
你若是貪食的人,就著用刀下佇嚨喉。
3
呣通貪伊的好食物,因為是騙人的食物。
4
呣通拖磨來求好額,呣通倚靠家己的聰明。
5
你豈欲注目佇彼個空虛的嗎?因為錢財家己欲發翅,親像鷹鳥飛上天。
6
呣通食堅吝的人的飯,也呣通貪伊的好滋味;
7
因為伊的心按呢想,伊做人也按呢。伊雖然對你講,請食,請飲,總是伊的心無意向你。
8
就你所食彼點仔欲吐出來;所講的好話歸佇空空。
9
呣通講話互戇人聽,因為伊欲看輕你智慧的話。
10
呣通移徙早時所立的地界,也呣通侵入無父的子的田地。
11
因為贖回in的有大權能,伊欲對你來伸in的冤。
12
著專心向佇教示,俯耳孔佇智慧的話。
13
囝仔呣通無教督;你用箠拍伊,boe致到死。
14
你用箠拍伊,就通救伊的靈魂免落陰府。
15
我的子,你的心若有智慧,我的心的確真歡喜。
16
你的嘴若講正直,我的心腸也欲快樂。
17
你呣通欣羨歹人,獨獨著通日敬畏耶和華;
18
因為猶有將來的報應,你的向望也boe會斷絕。
19
我的子,你著聽,著有智慧,閣引導你的心佇正直的路。
20
好飲酒的,貪食肉的,你呣通及伊往來,結交抑做陣;
21
因為好酒貪食的,欲致到喪鄉;愛睏的,欲致到穿破衫。
22
你著聽趁生你的老父;你的老母老的時,也呣通看輕伊。
23
著買真理,呣通賣出;智慧、教示、及明理也著按呢。
24
義人的老父欲大快樂;人生著智慧的子,欲因為伊來歡喜。
25
你著互你的父母歡喜,互生你的母快樂。
26
我的子,著將你的心獻互我;你的目睭也著歡喜我許個路。
27
因為娼妓是深坑;淫婦是狹的井。
28
伊teh當等親像賊;佇人的中間加添詭詐的人。
29
是誰有災禍?是誰有憂悶?是誰有相爭?是誰有吐氣?是誰無緣故受傷?是誰目睭紅霧?
30
就是彼號飲酒呣知息,四界尋調和的酒,彼號人。
31
酒成做紅,佇杯內成做色水,飲了滑喉,你呣通看伊,
32
到尾親像蛇teh咬你,親像毒蛇teh螯你。
33
你的目睭欲看奇異的事;你的心欲發出乖謬。
34
你欲親像倒佇海中,抑是親像睏佇船桅頂的人。
35
你欲講:人拍我,我無受傷;人摃我,我呣知。我底時精神,我閣去尋酒。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!