箴言 第 27 章 - 台語漢字羅馬本

1
呣通為明仔日來家己誇口,因為你呣知一日欲生出甚麼事。
2
著互別人謳咾你,呣通用你家己的嘴;互外人謳咾你,呣通用家己的嘴唇。
3
石頭重,沙也是按呢,戇人的受氣比此二項卡重。
4
大受氣是殘忍,受氣是氾濫的水;獨獨佇妒忌的頭前是誰徛會住?
5
顯然的責備贏過隱密的愛情。
6
朋友的拍傷出佇忠信;獨獨對敵的唚嘴是過額多。
7
人食飽,厭忌蜜房的蜜;腹肚枵餓,一切苦的物攏掠做甜。
8
人離開本所在去漂流,是親像鳥仔離開伊的巢四界飛。
9
膏油及香料互人的心歡喜;朋友實心的苦勸,伊的甜也是按呢。
10
你的朋友及老父的朋友,你攏呣通棄拺,你抵著患難的日,呣通去兄弟的家;附近的厝邊贏過遠遠的兄弟。
11
我的子啊,你著有智慧,互我的心歡喜,互我通應答彼個譏刺我的人。
12
通達的人看見災禍就閃匿;戇直的人進前去就受害。
13
為著生份人擔保,著提彼人的衫;為著妓女做保認,彼個人著擔當責成。
14
清早起來,大聲給朋友祝福,此個事算伊做咒詛。
15
大雨的日水滴無息,吵鬧的婦仁人也按呢;
16
愛阻擋伊的,就是阻擋風,伊的正手親像著油。
17
鐵磨鐵,互伊利;朋友相激勵也是按呢。
18
顧守無花果樹的,欲食伊的果子;顧伊的主人的,欲得著榮光。
19
親像照佇水裡,面及面相對;人的心及人相對也是按呢。
20
陰府及滅無攏不知足;人的目睭不知足也是按呢。
21
篋仔是欲鍛煉銀,爐是欲鍛煉金,對謳咾也通試驗人。
22
你雖然用臼槌將戇人及拍碎的麥相及舂佇臼內,伊的戇也會離開伊。
23
你著詳細知你的羊群的景況,留心料理你的牛群;
24
因為錢財會永永佇,冕旒豈會存到代代嗎?
25
乾草已經收,草樣閣發起來;山頂的菜蔬也已經收拾。
26
羊的毛是通互你做衫;山羊做田園的價錢,
27
也有山羊的奶互你,及你的家眷食,也通養飼你的女婢。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!