箴言 第 8 章 - 台語漢字羅馬本

1

智慧豈無叫？聰明豈無出聲？

2

伊佇路邊高地的頂面，佇十字路口徛，

3

佇城門邊，佇城門口，佇城出入的所在，大聲叫講：

4

眾人啊，我叫恁，我向世間人出聲。

5

講：戇直的人啊，恁著會曉得通達的理；愚戇的人啊，恁心內著明白。

6

恁著聽，因為我欲講極好的事；我欲開嘴論正直的事。

7

我的嘴欲講出真實；我的嘴唇怨恨歹代。

8

我所講的話攏是公義，其中無彎曲乖謬。

9

這會明理的人，攏會曉得，得著智識的人，攏掠做正直。

10

恁著承受我的教示，卡好得著白銀；得著智識，卡好得著黃金。

11

因為智慧比紅寶石卡好；一切所欣慕的攏及伊比得。

12

我──智慧用通達做徛起的所在，閣尋著智識及計劃。

13

敬畏耶和華在佇怨恨歹代；彼號驕傲、濫糝，及歹路，以及乖謬的嘴，攏是我所怨恨。

14

我有計劃及真的智識；我就是聰明，我有能力。

15

帝王對我來坐位；人君對我定著公平的法。

16

王親及貴族，世上一切的審判司，攏是對我來掌權。

17

疼我者，我也疼伊；懇切尋我者，欲尋著。

18

好額尊貴在佇我；久長的富有及公義也在佇我。

19

我的果子卡好黃金，贏過好金；我的出色贏過紋銀。

20

我行佇公義的路，行佇公平諸個路中，

21

互疼我的人承受貨財，也充滿的府庫。

22

佇耶和華造化的起頭，佇極起頭創造的代先，我是伊所有。

23

對永遠，對極起頭，未有世界的代先，我已經受設立。

24

未有深淵，未有多多水的水泉，已經生我。

25

大山未定著，小山未有的代先，已經生我。

26

耶和華猶未創造大地及田野，以及地上土粉的原質。

27

伊建立諸個天，設圓環佇深淵的頂面。

28

頂面安置穹蒼，堅固深淵的水泉，

29

給海定著界限，互水無過伊的命令，定著大地的根基，我及伊佇。

30

彼時，我佇遐做師傅頭，日日互伊歡喜，常常佇伊面前快樂，

31

佇通徛起的地快樂，也及世間人相及歡喜。

32

恁諸個子，今著聽趁我，因為執守我的道路者，就有福氣。

33

著聽教示就得著智慧，呣通棄絕伊。

34

聽趁我、日日佇我的門口等、佇我的門豎邊聽候的，彼號人有福氣。

35

因為尋著我者，就尋著活命，也欲對耶和華得著恩惠。

36

得罪我者，是害家己的生命；怨恨我者，攏是家己取死。