詩篇 第 119 章 - 台語漢字羅馬本

1
所行完全、遵趁耶和華律法者,此號人有福氣!
2
遵守伊干證的話,專心尋伊者,此號人有福氣!
3
無做不義的事,遵趁伊的道路。
4
你曾將你教示的話吩咐阮,是愛阮殷勤遵守。
5
願我的趨向定著,來守你的律例。
6
我對重你一切的誡命,就不致見誚。
7
我學習你公義的判斷,就欲用正直的心感謝你。
8
我欲守你的律例;求你呣通一盡放拺我!
9
少年人著用甚麼來清氣伊的所行?是著照你的話來細膩行!
10
我專心尋你;求你呣通互我迷路離開你的誡命。
11
我將你的言語囥佇我的心內,免得我得罪你。
12
耶和華啊,你是應該受謳咾者!求你將你的律例教示我!
13
你所講一切的判詞我用嘴唇報揚伊。
14
我歡喜你干證的路,親像歡喜一切的財物。
15
我欲靜靜想你教示的話,亦欲注重你的道路。
16
我欲佇你的律例中家己快樂;我無記得你的話。
17
求你用大恩款待你的奴僕,互我得著活,我就欲守你的話。
18
求你開我的目睭,互我看出你律法中的奇妙。
19
我佇地上是做寄腳者;求你呣通對我隱密你的誡命!
20
我的心爆裂,因為時常切切欣慕你的判詞。
21
你責備驕傲受咒詛的人,就是迷路離開你的誡命的人。
22
求你給我除去凌辱及看輕,因為我守你干證的話。
23
貴族坐濫糝議論我,若是你的奴僕靜靜想你的律例。
24
你干證的話是我所歡喜的,是我的謀士。
25
我的生命敆住佇土粉;求你照你的話拯救我活!
26
我講起我所行的路,你應我;求你將你的律例教示我!
27
求你互我明白你教示的路,我就靜靜想你的奇事。
28
我的心神因為憂苦來消溶;求你照你的話互我勇健!
29
求你互我離開奸詐的路,將你的律法恩賜我!
30
我有揀信實的路,將你的判詞下佇我的面前。
31
我戀慕你干證的話;耶和華啊,求你呣通互我見誚!
32
你開闊我的心的時,我就走佇你誡命的路。
33
耶和華啊,求你將你律例的路指示我,我欲徹底遵守!
34
求你互我智慧,我就守你的律法,閣欲專心執守。
35
求你互我行你誡命的路,因為此個路是我所歡喜的。
36
求你互我的心向你干證的話,無向不義的錢財。
37
求你互我的目睭越走無看虛假,閣互我佇你的路中來活。
38
你的奴僕敬畏你,求你為伊堅固你的話!
39
求你互我所驚的凌辱離開我,因為你的判詞是好。
40
我欣慕你教示的話;求你佇你的公義互我來活!
41
耶和華啊,願你照你的話,互你的慈愛,就是你的救恩,臨到我,
42
我就有話通應彼個凌辱我者,因為我倚靠你的話。
43
求你互真理的話無一盡離開我的嘴,因為我向望你的判斷。
44
我欲常常守你的律法,直到永遠。
45
我欲行佇寬闊的所在,因為我有講究你教示的話。
46
我亦欲佇君王的面前講論你干證的話,亦無致到見誚。
47
我欲佇你的誡命中家己快樂;諸個誡命平素是我所疼惜的。
48
我疼惜你的誡命,我欲對伊抬起手;你的律例我亦欲靜靜想伊。
49
求你記得對你的奴僕所應允的話,因為你曾互我有向望。
50
你的話將我救活;我佇患難中,對這得著安慰。
51
驕傲的人盡在侮慢我,總是我未曾偏離你的律法。
52
耶和華啊,我記念你對早以來的判詞,就家己得著安慰。
53
我因為棄拺你的律法的歹人,就大受氣,親像火。
54
我佇寄腳的厝,平時用你的律例做詩歌。
55
耶和華啊,我暝間記念你的名,守你的律法。
56
我得著按呢,是因為我守你教示的話。
57
耶和華是我的基業;我曾講:我欲守你的話。
58
我曾專心求你的恩;願你照你的話憐憫我!
59
我深深想我所行的路,就越轉腳向你干證的話。
60
我守你的誡命,趕緊無延延。
61
歹人的索縛纏我,總是我無記得你的律法。
62
我因為你公義的判斷,半暝欲起來感謝你。
63
見若敬畏你,及守你的教示的人,我及做伴。
64
耶和華啊,你的慈愛遍滿地面;求你將你的律例教示我!
65
耶和華啊,你曾好款待你的奴僕,是照你所講的話。
66
求你將好的聰明及智識教示我,因為我信你的誡命。
67
我未受苦以前有行迷路,總是我今守你的話。
68
你是好,所行亦是好;求你將你的律例教示我!
69
驕傲的人造作無影話攻擊我,總是我欲專心守你的教示。
70
的心鈍親像油包密,總是我歡喜你的律法。
71
我有受苦是做我的利益,因為欲互我學習你的律例。
72
你所講的律法是做我的利益,贏過千萬個金銀。
73
你的手創造我,成持我;求你互我智慧,通學習你的誡命!
74
敬畏你的人看見我就欲歡喜,因為佇你的話我有向望。
75
耶和華啊,我知你的判斷是公義;你互我受苦是對佇信實。
76
求你用你的慈愛安慰我,照你對你的奴僕所講的話。
77
願你的慈悲臨到我,互我活,因為你的律法是我所歡喜的。
78
願驕傲的人受見誚,因為無理由枉屈我;總是我欲靜靜想你的教示。
79
願敬畏你的人歸向我,就知你干證的話。
80
願我的心完全守你的律例,互我不致見誚。
81
我的心神欣慕你的救恩到昏去,總是佇你的話我有向望。
82
我因為向望你的話目睭花,講:你甚麼時欲安慰我?
83
因為我親像佇火薰中的皮袋,總是我無記得你的律例。
84
你的奴僕的日子有偌多啊?你欲底時審判窘迫我的人?
85
驕傲的人就是無趁你的律法者,掘陷坑欲害我。
86
你的誡命一盡誠實;無因端窘迫我,求你幫助我。
87
險險滅無我佇世間,總是我無放拺你的教示。
88
求你照你的慈愛互我活,我就欲守你的嘴干證的話。
89
耶和華啊,你的話安定佇天裡,直到永遠。
90
你的誠實存到萬代;你建立地,地就長長佇。
91
照你的定例,到今猶佇,因為萬物攏是你的差用,
92
我若呣是歡喜你的律法,就早早佇我的苦難中滅無啦!
93
我永永無記得你的教示,因為你用這互我活。
94
我是你的,求你救我,因為我尋你的教示。
95
歹人當等我,欲滅無我,總是我欲講究你干證的話。
96
我看所有的完全攏是有限,獨獨你的命令極其開闊。
97
我疼惜你的律法到怎樣啊!我通日靜靜想。
98
你的誡命常常及我佇,互我比我的對敵卡有智慧。
99
我比我攏總的先生卡通達,因為我靜靜想你干證的話。
100
我比老人卡明白,因為我守你的教示。
101
我禁我的腳一切的歹路無行,互我通守你的話。
102
我無偏離你的判斷,因為你有教示我。
103
你的話佇我的上 到偌甜,佇我的嘴比蜜卡甜!
104
我對你的教示得著明白,所以我怨恨一切的邪路。
105
你的話做我腳前的燈,做我路上的光。
106
你公義的判斷,我曾咒誓欲遵守,我決斷按呢行。
107
我受苦到極;耶和華啊,求你照你的話互我活!
108
耶和華啊,求你鑒納我的嘴所歡喜獻的謳咾,閣將你的判詞教示我!
109
我的生命常常抵著危險,猶久我無記得你的律法。
110
歹人設羅網欲害我,總是我無偏離你的教示。
111
我將你干證的話做永遠的基業,因為這是我心內所歡喜的。
112
我互我的心專向你的律例,永遠遵趁,直到路尾。
113
二樣心的人是我所痛恨;獨獨你的律法是我所疼惜。
114
你是我閃匿的所在,閣是我的盾牌;我佇你的話有向望。
115
做歹的人啊,恁著離開我!互我通守我的上帝的誡命。
116
求你照你的話扶持我,互我活,亦無互我因為所向望的來見誚。
117
求你扶持我,我就得救,我欲常常對重你的律例。
118
見若行差路離開你的律例的人,你看輕;因為的詭詐是虛假。
119
世間的歹人,你攏給除去,親像渣滓;因為按呢我疼惜你干證的話。
120
我因為驚畏你,我的肉就惙;你的判斷亦互我驚惶。
121
我秉公行義,求你呣通將我放互壓制我的人!
122
求你保認你的奴僕,通得著好境遇,莫得互驕傲的人壓制我!
123
我因為向望你的救恩,及你公義的話致到目睭花。
124
求你照你的慈愛款待你的奴僕,將你的律例教示我。
125
我是你的奴僕,求你互我智慧,互我會知你干證的話。
126
現今當是耶和華行代誌的時,因為人廢無你的律法。
127
所以,我疼惜你的誡命贏過金,亦贏過好金。
128
所以你一切的教示,萬事我攏掠做正直;閣我怨恨一切的邪路。
129
你干證的話是奇妙,所以我的心謹慎執守。
130
你的話一下開拆就發出光,互戇人通達。
131
我開嘴直直喘,因為我切切欣慕你的誡命。
132
求你越轉向我,憐憫我,親像你平常款待許個敬愛你的名的人。
133
求你用你的話互我的腳步穩當,莫容允甚麼罪惡管轄我。
134
求你救贖我脫離人的壓制,我就欲守你的教示。
135
願你互你的面的光照你的奴僕,閣將你的律例教示我。
136
我的目屎親像溪水流,因為無守你的律法。
137
耶和華,你是公義的;你的判斷亦是正直的!
138
你所命令干證的話是照公義極其誠實。
139
我的心熱,親像火燒滅我,因為我的對敵記得你的話。
140
你的話鍛煉到真精,所以你的奴僕真意愛。
141
我卑微,互人看輕,總是我無記得你的教示。
142
你的公義是永遠的公義;你的律法是真實。
143
我抵著患難憂苦,總是你的誡命是我所歡喜的。
144
你干證的話永遠是公義;求你互我智慧,我就會活。
145
耶和華啊,我專心求叫你;求你應我,我欲謹慎守你的律例。
146
我對你求叫,求你救我!我就欲守你干證的話。
147
我趁天未光求叫你;佇你的話我有向望。
148
暝時更猶未深我的目睭已經 開,因為欲靜靜想你的話。
149
求你照你的慈愛聽我的聲;耶和華啊,求你將你的判斷互我會活!
150
慣練行歹的人迫倚來;離開你的律法遠遠。
151
耶和華啊,你是近近;你的誡命攏是真實!
152
我講究你干證的話,早早已經知是你立定到永遠的。
153
求你看顧我的苦難,來牽救我,因為我無記得你的律法。
154
求你給我伸冤,救贖我,照你的話互我活。
155
救恩離開歹人遠遠,因為無尋你的律例。
156
耶和華啊,你的慈悲是大;求你照你的判斷互我活。
157
窘迫我的,抵敵我的,真多,總是我無偏離你干證的話。
158
我看見奸惡的人就真厭惡,因為無守你的話。
159
你看我怎樣疼惜你的教示!耶和華啊,求你照你的慈愛互我活!
160
你的話的總根頭是真實;你一切公義的判斷是永遠佇。
161
貴族無因端窘迫我,總是我的心驚畏你的話。
162
我歡喜你的話,親像人得著多多贏的物。
163
白賊話是我所痛恨所厭賤的;你的律法是我所疼惜的。
164
我因為你公義的判斷逐日七擺謳咾你。
165
疼惜你的律法的人有大平安,無一項會纏絆的腳。
166
耶和華啊,我有向望你的救恩,有行你的誡命。
167
我的心有守你干證的話;諸個話我盡在意愛。
168
我有守你的教示及你干證的話,因為我一切所行的攏佇你的面前。
169
耶和華啊,願我求叫的聲透到你的面前,求你照你的話賞賜我智慧。
170
願我懇求的話到你的面前,求你照你的話牽救我。
171
願我的嘴唇發出謳咾的話,因為你將你的律例教示我。
172
願我的舌唱歌謳咾你的話,因為你一切的誡命攏是公義。
173
願你伸手幫助我,因為我有揀你的教示。
174
耶和華啊,我切切欣慕你的救恩!你的律法亦是我所歡喜的。
175
願我活,我的神魂就欲謳咾你!願你的判斷幫助我!
176
我迷路親像拍呣見的羊,求你尋你的奴僕,因為我無記得你的誡命。

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!