詩篇 第 22 章 - 台語漢字羅馬本

1
〔大衛的詩,交互樂官。調用「早起時的鹿母」。〕我的上帝,我的上帝!啥事放離我?啥事離開遠遠無救我?呣聽我喉叫的話?
2
我的上帝啊,我日時求叫,你無聽我,暝時求叫,我亦無靜靜。
3
總是你是聖,你是用以色列的謳咾做座位者。
4
阮的列祖倚靠你;倚靠你,你就拯救。
5
哀求你,就得著拯救;倚靠你,就不致見誚。
6
總是我是蟲,呣是人,互人譏刺,互百姓看輕。
7
凡若看見我的攏恥笑我;譊嘴搖頭,講:
8
著將本身交代耶和華,伊通救伊!耶和華既然歡喜伊,伊通救伊!
9
總是你是互我出老母的胎者;我佇老母的胸前,你互我倚靠你。
10
我對胎裡出就交代你;對我出老母的腹肚,你是我的上帝。
11
呣通離開我遠遠!因為患難迫近,無有幫助我的。
12
有多多牛圍纍我,巴珊勇的牛四面圍困我。
13
向我開嘴,親像擘拆,大聲哮的獅。
14
我親像水傾出;我的骨攏脫輪;我的心親像蠟消溶佇腹內。
15
我的精力枯焦,親像瓦片坯;我的舌粘佇我的上 。你下我佇死地的土粉。
16
狗的類圍我,歹黨包圍我;鑿我的手,我的腳。
17
我的骨頭,我攏會算得;看我相我。
18
分我的衫,拈鬮我的衣服。
19
耶和華啊,求你呣通離開我遠遠!我的氣力啊,求你緊緊來幫助我!
20
求你救我的神魂脫離刀劍,救我的生命脫離狗的類的勢力,
21
救我脫離獅的嘴;你已經聽我,互我脫離野牛的角。
22
我欲報揚你的名佇我的兄弟,我欲謳咾你佇會中。
23
恁驚畏耶和華者著謳咾伊!雅各的後裔攏著榮光伊!以色列的後裔攏著敬畏伊!
24
因為伊無看輕,亦無厭賤困苦人的困苦,亦無對伊掩面;伊求叫伊的時,伊就聽伊。
25
我佇大聚會的中間所謳咾者是對你來;我欲佇驚畏伊的人的面前謝我的願。
26
謙卑的人欲得著食飽;尋耶和華的人欲謳咾伊。願恁的心活到永遠!
27
地的極頭攏欲數念,來歸順耶和華;列邦的萬族攏欲敬拜佇你的面前。
28
因為國是耶和華的;伊是萬國的主宰。
29
地上一切好漢的人欲飲食來敬拜;見若歸土的人──會保全生命者──攏欲仆拜佇伊的面前。
30
有後裔欲服事伊;主的代誌欲傳佇後代。
31
欲來亦欲傳伊的公義互得欲出世的百姓,知此個事是伊做的。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!