詩篇 第 25 章 - 台語漢字羅馬本

1
〔大衛的詩〕耶和華啊,我的心神仰望你。
2
我的上帝啊,我平素倚靠你;呣通互我見誚,呣通互我的對敵因為贏我來誇口。
3
見若聽候你者的確無見誚;許個無緣故行奸詐者欲見誚。
4
耶和華啊,求你將你的道路指示我,將你的路途教示我!
5
求你導我佇你的真理,閣教示我,因為你是救我的上帝。我通日聽候你。
6
耶和華啊,求你記念你的憐憫及你的慈愛,因為這是古早以來常常有的。
7
求你呣通記念我少年的罪過及我的過失;耶和華啊,求你照你的慈愛,因為你的恩惠記念我,
8
耶和華是好閣正直,所以伊欲指示罪人行正路。
9
伊欲用公平引導謙遜的人,伊欲用伊的道路教示謙遜的人。
10
見若守伊的約及伊的干證的人,耶和華款待攏是用慈愛誠實。
11
耶和華啊,我的罪真重,求你因為你的名赦免我。
12
甚麼人敬畏耶和華,耶和華欲指示伊所著揀的路。
13
伊的心神欲得著安息;伊的後裔欲承接土地。
14
耶和華及敬畏伊的人親密;閣欲將伊的約指示。
15
我的目睭常常向耶和華,因為伊欲互我的腳脫離羅網。
16
求你越轉向我,可憐我,因為我是孤單閣困苦。
17
我的心內的憂苦真多,求你救我脫離佇我攏總的患難。
18
求你看我的艱難,及我的勞苦,赦免我一切的罪。
19
求你看我的對敵,因為真多,怨恨我真惡毒。
20
求你保護我的生命,拯救我,互我無見誚,因為我倚靠你。
21
願純全、正直保護我,因為我聽候你。
22
上帝啊,求你救贖以色列脫離伊一切的艱苦。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!