詩篇 第 32 章 - 台語漢字羅馬本

1
〔大衛的教示的詩。〕過失得著赦免,罪過得著遮蓋者,這人有福氣!
2
耶和華無算伊做有罪,伊的心無奸詐者,這人有福氣!
3
我靜靜的時,我的骨頭枯焦。因為我通日大聲哮。
4
因為暝日,你的手重重扼我;我的精液,變親像夏天的乾燥。(細拉)
5
我對你排列我的罪過,無隱瞞我的罪惡。我講:我欲對耶和華承認我的過失,你就赦免我犯法的罪。(細拉)
6
因為按呢,見若虔誠的人佇通尋著你的時著祈禱你;大水氾濫的時,的確到伊遐。
7
你是我閃匿的所在;你欲庇佑我脫離艱苦,你欲用得救的歌四面圍我。(細拉)
8
我欲教示你,指示你應該行的路;我欲注目看你來勸戒你。
9
呣通親像馬、騾,無智識,著用馬咬韁馬勒索約束;若無,就呣倚近你。
10
歹人受多多苦難;獨獨倚靠耶和華的人欲有慈愛四面圍伊。
11
恁義人啊,著因為耶和華來歡喜快樂;心正直的人啊,恁著出歡喜的聲。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!