詩篇 第 39 章 - 台語漢字羅馬本

1
〔大衛的詩,交互樂官耶杜頓。〕我曾講:我欲謹慎我的路,免得用我的舌犯罪;歹人佇我面前的時,我欲約束我的嘴親像馬咬韁。
2
我靜靜無聲,連好話亦無講出嘴;我的憂悶就夯起來,
3
我的心佇我的內面熱熱。我靜靜想的時,火就起來,我就用舌來講。
4
耶和華啊,求你互我知本身的結局!及我年歲的數額偌多?互我知軟弱到怎樣!
5
你互我的日子親像一巴掌;我一生的年歲,佇你的面前親像無。逐人徛在的時,真正攏是空空。(細拉)
6
世間人行做實在親像影。無閒,真正無採工;切切伊所積聚的,呣知將來是誰得去。
7
主啊,我今聽候甚麼?我的向望在佇你!
8
求你救我脫離我一切的過失,呣通互我受戇人的凌辱。
9
我靜靜無開嘴,因為是你做的。
10
你所降的責罰求你給我除去;因為你的手督責,我就消滅。
11
你因為人的罪惡警戒伊的時,互伊所歡喜的消滅,親像著蛀蟲。世間人真正是空空!(細拉)
12
耶和華啊,求你聽我的祈禱,俯耳孔聽我的求叫!我流目屎,求你呣通無出聲!因為我佇你的面前是出外人,是寄腳者,親像我的列祖一般樣。
13
求你寬容我,互我猶未去來歸佇無的代先通得著爽快。

台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!